望廈社屋

望廈社屋（葡萄牙文：Bairro Social de Mong-Há），又叫做望廈新邨，重建前叫做望廈平民新邨，望廈社屋樓群響澳門半島慕拉士大馬路、俾利喇街同黑沙環斜路。

望廈社屋
澳門公共房屋
所屬堂區						花地瑪堂區
房屋類型						社會房屋
房屋用途						住宅
總塔樓座數						3
塔樓
			第1座 望善樓
			入伙日子			2010年7月29號
			樓齡			14年
			第2座 望賢樓
			入伙日子			2012年8月30號
			樓齡			12年
			第3座 望廈社屋重建第二期
停車場
			望善樓停車場
			輕型汽車車位				133
			電單車車位				236
			詳細資訊一覽 出入口位置：區神父街
			望賢樓停車場
			輕型汽車車位				143
			電單車車位				242
			詳細資訊一覽 出入口位置：俾利喇街

背景

原嚟係葡萄牙陸軍球場，入面除咗擁有一個眞草足球場之外，四周重有泥沙質地嘅田徑場，附近亦設有畀葡萄牙軍人做體能同戰爭技術訓練嘅設備。有時會借畀體育團體同學校嘅練習同比賽。

1979年林茂塘木屋區大火，澳葡政府響望廈陸軍球場整咗臨時收容所安置幾千個火災居民。幾年之後，收容所改建做望廈平民新邨，加埋有六百五十個單位，可以容納到二千人，當時租金係葡幣十九至八百五十蚊。部分地段就開闢成馬路，嚟延長俾利喇街同慕拉士大馬路連接。

望廈體育館

球場部分地段響1980年代起咗望廈體育館，成為澳門第一個公衆室內體育館。1993年，澳門理工學院體育暨運動高等學校遷入。

2010年7月，澳門政府宣布啟動望廈社屋二期重建計劃，將望廈體育館納入擴建計劃，將佢拆咗。

樓群

望善樓

望善樓係望廈社屋重建第一期項目，澳門政府利用響慕拉士大馬路一幅工廠地段起咗一幢樓高三十三層，提供三百零八個T1一房單位、一百九十六個T2兩房單位同八十四個T3三房單位，加埋五百八十八個社屋單位，響2010年6月落成。

望賢樓

望賢樓係望廈社屋俾利喇街公屋項目，響俾利喇街嘅望賢樓原嚟係望廈兵營，響2012年8月30號落成，樓高三十三層，地舖係房屋局辦公室，一、二樓係停車場，提供三百八十五個車位，三樓係平台花園，四至三十三樓係社屋單位，加埋三百四十二個T2兩房單位。

望廈社屋重建第二期

2010年7月2號，房屋局、土地工務運輸局、建設發展辦公室同體育發展局舉行聯合記者會，介紹望廈社屋二期嘅重建計劃。重建之後嘅望廈社屋，樓高三十七層，由裙樓同兩座塔樓組成，將提供唔少過七百五十個單位。另外，地底三層會起公共停車場，提供五百個私車車車位；亦會響地面起公共巴士轉乘站。同時，望廈體育館會納入重建計劃，將佢一齊拆卸重建，而重建之後嘅望廈體育館面積會比宜家大五倍。。

原來嘅望廈社屋租戶會由2010年9月開始陸續安排搬到新起嘅望廈社屋一期，而望廈社屋二期嘅重建工程將會響租戶搞掂嗮搬遷之後先會開工，但之後工程因為政府同承建商傾唔掂數一直停工超過四年。

2016年，政府同原嚟望廈社屋第二期同望廈體育館地基承建商解約之後重新招標，今次重連埋體育館建築物一齊起。

2017年2月20號，政府公報刊登行政長官批示，政府判畀兩間合組公司起望廈社屋第二期同重建望廈體育館工程造價係十七點八億，將會分六年嚟畀，今年先畀二點三億葡幣；根據建設發展辦公室嘅網頁，工程範圍重包括望廈社會房屋嘅社會設施裝修工程同響文化局已經評定做紀念物「刻咗徽號嘅大石」周邊綠化同休憩區工程。工程完成之後會提供七百六十八個單位，公共巴士轉運站、公共停車場、綠化休憩區、社會設施同綜合體育館。

睇埋

• 望廈山
• 望廈山市政公園
• 望廈圖書館