朱愚齋

朱愚齋（1892年—1984年）原名朱棠，筆名齋公，祖籍廣東南海，係香港一位作家。

朱愚齋曾經跟過廣州海幢寺嘅和尚學武，嚟到香港之後拜黃飛鴻徒弟林世榮為師，學習武術同跌打醫術，然後喺香港中環威靈頓街開咗間「安和堂藥局」。

1931年，朱愚齋開始幫《工商晚報》寫《國術稗史》系列，又寫咗《粵派大師黃飛鴻別傳》、《粵派拳師陸阿采別傳》、《林世榮正傳》、《嶺南奇俠傳》、《嶺南武術叢談》、《南海拳豪》、《少林英列傳》、《鐵馬騮秘史》、《粵派蔡家鼻祖軼事》、《雷振聲成名秘辛》、《黃飛鴻湖海浮沉秘籍》等等。佢亦曾經奉師父之命，發行師父遺技《鐵綫拳》同埋《虎鶴雙形》，將每一招式都用真人影相示範。

朱愚齋嘅黃飛鴻作品曾經多次改編成粵語長片，佢亦監製過《黃飛鴻義救海幢寺》(下集)。「播音皇帝」鍾偉明為咗講述陸阿采、黃飛鴻、洪熙官嘅故仔，重拜咗朱愚齋做師父，聽佢講解技擊武術。

睇多啲

• 《粵派拳師陸阿采別傳》（中國哲學書電子化計劃）