朱棣

朱棣（1360年6月1號—1424年8月12號）係大明第三個皇帝，開國皇帝朱元璋第四仔，1402至1424年在位。死後廟號成祖，所以又叫明成祖。年號永樂，又叫永樂皇帝。

明成祖朱棣畫像

洪武三年（1370年），受封燕王。十三年（1380年），就藩北平（家下北京）。二十三年（1390年），率師北征，擒北元乃兒不花。長期參加北方軍事，秦、晉二王死後，做諸藩王之首，有奪嫡之謀。建文元年（1399年），以反對建文帝削藩為名，喺北平起兵，號稱「靖難」。四年，攻入南京，奪位登極，改嗰年做洪武三十五年，第二年開始用永樂年號。

朱棣做皇帝之後，繼續「削藩」之舉，設置內閣，任用宦官，建東廠，恢復錦衣衛獄，實行專制集權統治；重視對北方經營，即位初即改北平做北京，又先後五次親征漠北，喺永樂十九年（1421年）遷都北京，史稱「永樂遷都」（又叫做「天子守邊」）；此外，三年喺西北設置哈密衛，七年喺東北設置奴兒干都司，又開設貴州布政使司，加強對西南統治，有助統一；繼續太祖恢復經濟措施，鼓勵屯墾，推動軍屯，開通漕運；對外多次命人出使，有鄭和下西洋、陳誠使西域。但佢奪位之後，革除建文年號，殺戮建文遺臣，齊泰、黃子澄同方孝孺都畀佢殺咗；屢興工程，起北京同宮殿、陵寢；北征之外又用兵安南（家下越南北部），改安南為交阯布政使司以內屬。終以勞民過重而有江西李法良同山東唐賽兒起事。

永樂二十二年，佢唔理群臣反對，帶病率師親征漠北，回師途中死喺榆木川（家下內蒙古多倫西北）。葬長陵。初上廟號太宗，嘉靖十七年（1538年）改成祖。

朱棣過身之後，由太子朱高熾繼位，就係明仁宗。