李敏妮

李敏妮（Sherry），香港親中派傳媒人，香港網媒《透視報》主編。

經歷

佢喺1996年加入有線電視英語頻道，1998年加入《英文虎報》做專題記者，兩年後轉職《南華早報》專題記者。2002年喺香港大學新聞及傳媒研究中心碩士畢業。

政治立場同經歷

佢係香港親中派嘅成員，曾經接受具有中共官方媒體背景嘅中國網誌「靖海侯」訪問，形容香港傳媒係2019年香港反送中運動暴力示威背後嘅龐大力量，並指責傳媒選擇性對抗爭者嘅暴力視而不見，同時將警方執法時嘅「錯失」無限放大。佢又曾經話記協荼毒記者，形容北京未經諮詢或香港人同意強行訂立嘅《港版國安法》係靈丹妙藥。

參選記協主席

不過，佢喺2024年6月參選香港記者協會主席嘅時候，以「為傳媒堅持」做口號，政綱提及自己嘅傳媒經驗，但就無提及佢喺2019年反送中期間創辦嘅建制網媒《透視報》。又話香港自我審查不斷惡化，記者又害怕《港版國安法》，結果無法充份表現，唔可以跟隨內心咁撰寫報導，削弱記者制止問題、改善社會嘅能力。

由於佢嘅親中派背景，佢嘅參選備受一啲質疑，其中香港勞權監察總幹事蒙兆達指，中共其中一個統戰手法，就係利用滲透形式，「鵲巢鳩佔」一啲拒絕被收編嘅組織。

之後，佢因為提名人臨時撤回提名而失去資格。