李珣 (前蜀)

李珣（粵拼：lei5 seon1；855年—930年），字德潤（dak1 jeon6），又有話字廷儀（ting4 ji4），花名李四郎（lei5 sei3 long4），梓州人（而家四川三臺），係五代十國時前蜀嘅詞人、藥學家。李珣係花間派詞人，《花間集》收有佢嘅詞37首。

李珣
字	德潤／廷儀
出世	855年
死	930年
國籍	前蜀
籍貫	梓州（四川三臺）
職業	詞人、藥學家

生平

李珣嘅生平散見於《鑑戒錄》、《茅亭客話》、《歷代詩餘》。佢嘅祖先係波斯人，可能係波斯商人李蘇沙嘅後人。佢祖先喺隋代來中國，唐代時跟住國姓姓李，佢老豆跟住唐僖宗過咗來四川，佢就喺四川大。李珣細個時就有詩名，佢嘅妹李舜弦亦識作詩，畀前蜀後主王衍納入後宮，封做昭儀。李珣考到秀才，識寫詩文，所以皇帝鍾意佢。前蜀亡國後，佢守節唔再出仕。老來佢搞煉丹，家產使曬，辭世時屋企得返道書、藥囊。佢細佬李玹亦係賣香藥嘅，亦係煉丹術士、藥學家。

藥學

佢家族係賣香藥嘅，所以佢學識咗藥理。佢曾經遊歷嶺南，參攷幾十種古書，返咗四川後寫低《海藥本草》（又叫《南海藥譜》）6卷。本書介紹海外各種藥方，專門收集國外藥物，諸如海桐皮、天竺掛、沒藥。亦都記啲食療方劑。佢對亞、歐、非各國嘅藥物從產地、形狀特點、藥性功能、鑑別方法都一一細講，所以對引入外國藥物好有價值。原書失傳，但後世醫家都多數引用佢啲內容，宋人唐慎微《政和證類本草》、明人李時珍《本草綱目》都引用過佢本書，而家知道本書記有藥物124種。

文學

李珣嘅文學有啲名聲，《花間集》稱佢做李秀才，留低作品《瓊瑤集》，已經失傳。而家嘅《瓊瑤集》係王國維輯錄嘅。傳世詞作54首，散見於《花間集》《尊前集》。《全五代詞》卷四六有佢三首《漁夫》。

佢作品題材闊，風格樸素，因爲來過嶺南，寫低好多南國風物。其他嘅詞諸如有男女嘅離愁別緒、讚美退隱生活。寫男女情事嘅詩詞，多少沾染花間風氣，但好多作品脫離呢種趣味，寫得明麗清新，好有特色，所以佢對北宋詞人幾有影響。詩方面，《全唐詩》錄佢詩詞54首。

下面係佢一啲嶺南詞。

南鄉子（其十） 相見處，晚晴天。 刺桐花下越臺前。 暗裏回眸深屬意，遺雙翠， 騎象背人先過水。

南鄉子（其三） 歸路近，扣舷歌。 採珍珠處水風多。 曲岸小橋山月過，煙深鎖。 豆蔻花垂千萬朵。