花間集
《花間集》（粵拼：faa1 gaan1 zaap6），係後蜀趙崇祚喺廣政三年（940年）編成嘅詞集，共十卷，收錄咗18位詞人嘅詞作，共500幾首，係現存最早嘅文人詞總集[1]。《花間集》總共用咗74種詞調，其中用得最多嘅係浣溪沙、菩薩蠻、臨江仙、酒泉子。呢部詞集喺四庫全書屬集部。
呢個集收錄嘅詞人稱爲花間派（faa1 gaan1 paai3），呢個唔係嚴格意義上嘅文學流派，但佢哋對詞嘅發展影響好大，直接影響南唐馮延巳、李煜嘅詞風，乃至形成花間小令傳統，延及至晏幾道，爲宋代嘅豔科奠定基礎。雖然一般認爲花間派嘅成就低過宋詞，但喺詞史中佔一席之地。
詞人
編輯《花間集》收錄咗18位詞人，分別係溫庭筠、皇甫松、韋莊、薛昭蘊、牛嶠、張泌、毛文錫、牛希濟、歐陽炯、和凝、顧敻、孫光憲、魏承班、鹿虔扆、閻選、尹鶚、毛熙震、李珣。當中溫庭筠、韋莊係花間派嘅代表人物。呢18位詞人幾乎都入仕西蜀，除咗溫庭筠、皇甫松係晚唐人，未入五代；孫光憲入仕荊南，和凝入仕後晉[1]。其中溫庭筠係花間派嘅鼻祖，佢將南朝宮體同北里倡風結合，係第一個努力作詞嘅詞人，因此列喺《花間集》第一位[1]。
創作環境
編輯晚唐五代，因爲國家衰亂，好多文化都衰弱咗，但詞呢種文學喺初創時同娛樂、伎女有好大關聯，結果喺南方反而繁榮。當時中國南方安定過北方，有幾個割據政權，呢啲政權無實力雄心去一統中國，有無長遠打算，所以借聲色豔詞消遣，形成西蜀、南唐兩個詞壇中心。
因爲噉，啲詞人創作啲詞係爲咗歌筵酒席時唱來消遣，所以啲詞基本係啲側豔之詞，縟采輕豔，綺靡溫馥。
詞風
編輯花間派嘅詞，佢哋嘅視野完全轉向裙裾脂粉、花柳風月，題材上主要寫女人嘅姿色、生活情狀，特別係佢哋嘅內心，所以寫嘅嘢大多係兒女艷情，離思別緒，綺情閨怨。同呢種情調相應嘅，喺風格上文采繁華、輕柔豔麗，崇尚雕飾，追求婉媚，充滿脂香粉膩。體制上，花間詞限喺小令，無題目，得詞牌。雖然具體各個詞人互有差異，不過呢啲都係總體嘅一致所在。
地位
編輯《花間集》代表住詞喺格律方面嘅規範化，標誌住喺文辭、風格、意境方面確立詞獨有嘅特徵（詞性特徵）[1]。《花間集》作爲詞集，有文本範例嘅性質，奠定日後詞呢種文體嘅發展基礎[1]。
目錄
編輯- 花間集敘
- 卷一 · 溫助教庭筠 五十首
- 卷二 · 溫助教庭筠 十六首 · 皇甫先輩松 十二首 · 韋相莊 二十二首
- 卷三 · 韋相莊 二十六首 · 薛侍郎昭蘊 十九首 · 牛給事嶠 五首
- 卷四 · 牛給事嶠 二十七首 · 張舍人泌 二十三首
- 卷五 · 張舍人泌 四首 · 毛司徒文鍚 三十一首 · 牛學士希濟 十一首 · 歐陽舍人烱 四首
- 卷六 · 歐陽舍人烱 十三首 · 和學士凝 二十首 · 顧太尉敻 十八首
- 卷七 · 顧太尉敻 三十七首 · 孫少監光憲 十三首
- 卷八 · 孫少監光憲 四十八首 · 魏太尉承班 二首
- 卷九 · 魏太尉承班 十三首 · 鹿太保虔扆 六首 · 閻處士選 八首 · 尹參卿鶚 六首 · 毛祕書熙震 十六首
- 卷十 · 毛祕書熙震 十三首 · 李秀才珣 三十七首
- 附錄一：詞家小傳
參攷資料
編輯- 袁行霈 羅宗强。〈第四編 隋唐五代文學 第十二章 詞的初創及晚唐五代詞〉. 《《中國文學史》第二版第二卷》。高等教育出版社。