東久邇聰子

東久邇聰子（日文：東久邇聡子ひがしくに としこ^{(Higashikuni Toshiko)}，1896年5月11號—1978年3月5號），日本舊皇族，係明治天皇嘅第九個女，同時係前首相東久邇宮稔彥王嘅老婆。響未皇籍脫離之前，尊稱係稔彥王妃聰子內親王（日文：なるひこおうひ としこないしんのう）。

東久邇聰子
原文名	ひがしくに としこ
羅馬拼音	Higashikuni Toshiko
出世	聰子 (1896-05-11)1896年5月11號 日本東京府東京市
死	1978年3月5號(1978-03-05)（81歲） 日本東京都
墓地	日本東京都文京區豐島岡墓地
配偶	東久邇宮稔彥王（1915年－1978年結婚）
仔女	東久邇盛厚 師正王 粟田彰常 多羅間俊彥
父母	明治天皇 園祥子

生平

東久邇聰子原本叫聰子，號泰宮（日文：やすのみや），皇族徽章係「孝」，尊稱為「聰子內親王」，1896年5月11號出世，係明治天皇第九個女，阿媽係側室園祥子。

1915年同東久邇宮稔彥王結婚，尊稱改為「稔彥王妃聰子內親王」。佢地一共生咗四個仔，分別係大仔盛厚王、二仔師正王、三仔彰常王同細仔俊彥王。其中二仔師正王響1923年嘅關東大地震中死咗，令聰子十分傷心。

聰子嘅老公稔彥王自1920年起就去咗法國留學，聰子就好多時留響日本。而稔彥王到法國後感受到自由開放嘅空氣，慢慢地就唔想返傳統嘅日本，甚至響法國包起二奶，響日本引起軒然大波。1926年大正天皇病重，點知作為皇室成員嘅稔彥王唔想返嚟見大正天皇，聰子好嬲，同稔彥嘅隨從寫咗一封信，認為稔彥嘅行為令自己「顏臉掃地」。最後由另一位響英國留學嘅皇室成員輝久王嘅勸說之下，稔彥王先至肯返嚟日本。

1947年10月4號，聰子跟住老公稔彥一齊皇籍脫離，改名叫「東久邇聰子」，自此之後，聰子降為平民，唔再係皇室成員，唔會再有皇族嘅待遇。響皇籍脫離之後，東久邇聰子一直響東京生活。

1978年3月5號，東久邇聰子過身，終年八十一歲。死後畀人葬響東京都文京區嘅豐島岡墓地。

榮譽

• 1915年（大正4年）5月17號 - 勳一等寶冠章
• 1940年（昭和15年）8月15號 - 紀元二千六百年祝典記念章