東南亞霾害

東南亞霾害（粵拼：dung1naam4a3maai4hoi6，英文：Southeast Asian haze）係一種定期發生同火有關嘅大型污染問題，主要喺7月至10月期間最嚴重。呢個災害嚴重影響印尼、馬來西亞、新加坡、汶萊，甚至係泰國同埋菲律賓嘅經濟活動、交通運輸、人民健康。呢種情況主要發生喺較乾嘅季節。霾害由1972年開始有記錄。

東南亞霾害
中文名
繁體字	東南亞霾害
簡化字	东南亚霾害
標音 官話 - 中文拼音 Dōngnányà mái hài

2013年喺馬來西亞雪蘭莪州拉賈·穆薩森林保護區（Raja Musa Forest Reserve）附近嘅泥炭火災。啲火喺表層下面無火焰咁慢慢悶燒

美國太空總署衛星圖像顯示2019年9月15號東南亞霧霾情況

導致呢個災害主要原因係大規模非法刀耕火種（slash-and-burn）耕種方法，特別喺印尼南蘇門答臘、廖內同加里曼丹。由於燒過嘅地可以非法咁賣得貴啲去畀人做油棕屬（oil palm）同紙漿用木材（pulpwood）。呢種方法快過又平過斬樹同用剷泥車或者其他機器去清理。

原因

大多數霧霾係由煙同火由蘇門答臘同埋加里曼丹引起。

潮濕嘅熱帶雨林係好少會導致大火，罕有嘅大火只會喺好乾燥情況下先會發生。

2005年一個研究總結咗無單一因素會觸發大火喺某笪地方發生，唔同地方發生嘅大火亦有好大差異。呢個研究分咗以下直接同間接引起大火原因：

• 直接因素
  • 用火嚟清理樹林
  • 土地使用權或者土地糾紛時用火作為武器
  • 意外
  • 同資源提取有關

• 間接因素
  • 土地使用權同土地分配引發嘅衝突同競爭
  • 破壞森林活動（Forest degrading practices）
  • 刺激經濟活動/抑制措施
  • 人口增長同過度城市化
  • 消防同管理不足

火用作一種工具去清理森林

火係清理森林去農田最平同最快嘅方法。火可以用嚟清除伐木或者原有農作物留低嘅植物材料。

用機器將植物材料耙做長堆畀佢哋一段時間腐爛又貴又慢，又可能會藏有害蟲。用機器同埋化學劑清除森林成本高達每公頃200美金，但係用火只需要每公頃5美金。

清除咗瀝乾泥炭沼澤森林之後，泥炭土壤仍然唔適合農業耕種，因為泥炭土壤營養貧瘠，酸鹼度大約只有pH 3-4。為咗令到泥土適合耕種，要加營養素中和pH值。另外，害蟲同植物病亦要清除，其中一種方法係用化學劑（例如石灰石）去中和酸度，亦會用肥田料同農藥。呢種方法成本大約印尼盾30-4,000萬每公頃。另一種方法係用火嚟清理伐木之後殘餘物質。同時火可以用嚟殺死害蟲，灰燼亦可以滋潤土壤同中和酸鹼度，呢種方法每公頃大約200萬印尼盾。

土地分爭

喺印尼，《基本林業法》授予林業部將所有土地歸類做森林。大約49% 土地（909,070平方公里）畀森林覆蓋。雖然印尼政府將69%土地（1,331,270平方公里）歸類做森林，但係傳統民族嘅土地權唔可以註冊，通常唔會畀國家承認。呢啲傳統民族無能力去訂立條例去規管燒森林行為，阻止非村民例如油棕種植園、伐木公司、其他村莊居民、移民、小規模伐木者以及移民等人嚟砍林。相互競爭反過嚟導致土地衝突。隨住新嘅外來者數量增加，可以火作為武器嘅可能性亦隨之增加。

泥炭嘅作用

泥炭喺潮濕情況之下嘅泥炭沼澤森林中形成，好似馬來西亞雪蘭峩州拉惹穆薩森林保護區

泥炭地係一笪地方有好多自然累積物質，包括樹葉同樹枝。呢啲物質已經喺自然含水條件環境之下累積咗10,000年。呢層有機物質叫泥炭（peat），可以有20米深。印尼擁有265,500平方公里泥炭地，佔大約13.9%國家總面積。另外，馬來西亞亦有相對多泥炭地，面積有26.685平方公里，佔國家總面積8.1%。

雖然最初係濕地生態系統，但係好多東南亞泥炭地已經畀人發展做各種用途，包括農業、林業同埋城市發展。其中一份2011年分佈嘅報告提到過去嘅20至30年之中，超過30%嘅泥炭沼澤森林已經轉化做農田。另外，再多30%嘅森林已經被砍伐或者退化。過度排水會導致泥炭土壤表層流失。由於泥炭含有高碳，會令到乾泥炭好容易燃燒，特別喺乾燥季節。

研究表明泥炭火災係導致霧霾主要因素。其中喺2009年，大約40%火災喺馬來西亞半島、婆羅洲、蘇門答臘同爪哇島偵測到喺泥炭地，即使只係覆蓋研究土地10%。 其中，1997年新加坡降雨含有高濃度硫，同PM2.5有密切關係，同泥炭火災中大量硫排放有關。

影響

東南亞霾害導致2019年9月11號喺馬來西亞首都吉隆坡能見度好差

大火所造成嘅破壞

引起火災嘅陰霾會造成各種直接同間接損失，其中包括森林、木材、農產品同生物多樣性。另外，火災仲會浪費大量滅火費用，又會增加碳排放。

人類方面

霧霾更加直接禍害包括影響人民短期健康同損害旅遊業發展。另外，霧霾仲會導致工業生產損失、航空公司同機場營運受阻、捕魚減少以及人工降雨成本增加。另外，嚴重霧霾天氣更加會導致長期健康損害、農作物生產量下降、能見度下降、增加唔必要支出、增加事故發生甚至係死亡以及減低外國投資者嚟投資意欲。

霧霾對健康嘅影響主要歸因喺細粉塵對鼻、喉嚨、呼吸道、皮膚同眼睛嘅刺激作用。

霧霾對健康嘅影響取決於佢嘅嚴重程度，呢個指標由污染物標準指數（PSI）衡量。指標高過100屬於唔健康，高過300代表危險。

受空氣污染影響，大多數人最容易會打乞嚏、流鼻涕、眼睛刺激、喉嚨乾同污染物引起嘅乾核。但係患有長期病患嘅人士，好似哮喘、慢性肺病、慢性鼻竇炎同皮膚過敏等健康問題人士可能影響更加大，可能會出現更嚴重嘅症狀。一般而言，細路同老人家更加容易受到影響。對某啲人嚟講，運動可能會令到症狀更加嚴重。

跨國界東南亞霧霾同各種心血管疾病有關聯，當中包括急性缺血性中風（acute ischemic stroke） 、急性心肌梗死（acute myocardial infarction）同心臟驟停（cardiac arrest）。

解決方法

以下解決方法係由 Dennis et al.提出，減少直接同間接因素引起森林大火，引起霧霾。

減少用火嚟清理樹林

印尼法律禁止用火嚟清理樹林用作農業用途，不過執法不力同缺乏對非法燒森林適當處罰係一個好大問題。好多公司仲話無燃燒過塊土地係不切實際同無競爭力。

解決土地分配同土地生產力

研究顯示最主要導致大火原因係同土地分配嘅競爭同衝突有關。中央政府機構分配嘅土地成日同當地司法管轄區同土著社區邊界重疊，所以區域性改革係有必要去解決資源衝突。同時，佢哋畀區域政府機會同當地原居民同習俗機構和解。區域性改革亦要確保土地同資源分配係符合當地各級特徵，同時亦要考慮火災風險。不過，印尼缺乏準確地圖、重疊邊界同埋唔夠技工喺各個省同地區導致呢個解決方法好難實現。

減少森林水平下降（forest degradation）活動

改善土地管理政策去恢復天然生態去一個水平下降咗嘅森林（degraded forest）係相當重要去減少重復發生嘅火災。同時，鼓勵社區參與去恢復工作係對減少火災嘅關鍵。

預防同控制火災

加里曼丹同蘇門答臘嘅大火凸顯咗有必要設立針對特定地區問題嘅消防管理系統。提供足夠嘅資源喺消防管理方面係相當重要嘅，同時亦要認識到唔同地區同居民多種需求。

技術包括遙控偵測、電子地圖同即時通信器材等技術可以幫助預測、檢測同應對可能發生嘅火災。但係，呢啲技術需要廣泛地使用、方使同透明地控制，先至有效改善農村地區消防管理。

經濟限制同刺激

除咗用經濟處罰方式應對非法縱火嘅有關刑事行為同對火災造成損失承擔責任之外，一啲政策分析家仲認為經濟政策改革同基於市場激勵措施亦有潛力。當中生態標籤（eco-labeling）同國際貿易管制可以減少市場對容易產生火災商品嘅需求，咁樣可以減少高火災風險商品生產。政府仲可以提供財政優勢，去保貼公司消防管理。