松岡環

松岡環（1947年—）係日本學者同埋日本「銘心會」創會會長，主張日本各界應該反省搞起侵華戰爭同南京大屠殺嘅戰爭罪行，畀普遍中國媒體叫做「日本嘅良心」。

松岡環喺日本大阪府生世，原本係大阪府松原市嘅一個歷史科小學老師。1988年開始，佢一直喺中國南京做嘢，睇到日本教科書淡化南京大屠殺嘅史實，於是決心畀下一代歷史真相，所以一直中國日本兩邊飛嚟飛去，訪問二百幾個日本老兵同埋三百個大屠殺生還嘅人，並將資料寫成書同做記錄片。即使佢期間畀日本右翼團體恐嚇，話佢係「反日老師」同埋「中國間諜」，但佢一直都無放棄過搵歷史真相。

佢認為喺第二次世界大戰嗰陣，日本曾經畀中國同埋好多亞洲國家嘅人帶嚟深重嘅災難，應該深刻咁反省同講對唔住，同埋賠錢畀受害者，並畀下一代真實咁知道歷史事實。為咗代表日本人講對唔住，佢喺每年8月15號，即係日本戰敗投降紀念日，帶住銘心會成員，去南京大屠殺紀念館悼念南京大屠殺遇難者。