林輝

林輝（LAM Fai Fred，1979年 11月—）係香港社會運動者，時事評論員，註冊社工，係智庫「Roundtable Community」前總幹事，亦曾經係民間媒體香港獨立媒體編輯部成員，本土行動成員。而家係全職旅行專欄作家。

林輝亦係民主黨觀塘區議會啟業選區議員歐玉霞嘅社區主任，2007年1月24號歐玉霞得47歲就因癌死咗^[1]，歐玉霞嘅議席空缺喺同年5月20號進行補選，之後青年民建聯成員施能熊贏咗補選^[2]。

林輝有份組織同參加好多社會運動，包括保衛天星碼頭、皇后碼頭、反高鐵、反政改等等，而參與過嘅團體包括有香港獨立媒體、八十後反高鐵青年等等。佢同陳景輝成日俾人叫做「美點雙輝」。

早年生活

林輝父母都係印尼華僑，喺中國大陸讀書同埋經歷過文革。之後林輝父母移民嚟香港定居，期間喺觀塘基督教聯合醫院生咗林輝。之後搬到公共屋邨樂華邨住^[3]。

林輝長大後拎到香港嶺南大學社會科學學士、香港中文大學社會工作碩士。喺嶺南大學嗰陣，佢曾做過社會科學系會執委會嘅外務副會長、評議會主席同埋學生會代表會修章委員會主席，重同時發起反對喺嶺南大學好近嘅地方起私人住宅嘅「藍色行動」^[4]。重有，佢亦有參與反戰集會、七一遊行等社會運動^[5]。