桌球
呢篇文講喺粵語區大多數叫桌球嘅品種。想搵英式嘅147滿桿嗰種桌球嘅話，請睇士碌架。
桌球（粵拼：coek3 kau4），又叫檯波（toi2 bo1，又寫做枱波）或𧰵波（duk1 bo1，又寫做篤波、督波），係一種喺全球範圍內比較多人玩嘅高雅室內體育運動，原理係用杆喺檯上面𧰵波、跟住計數而定邊個輸贏嘅室內娛樂體育項目。
呢個運動最早嗰時喺地上玩，就喺戶外嘅地挖個窿，將波用木棍𧰵入個窿入面。直到17世紀中葉先至從室外轉到室內嘅檯度玩。而家嘅桌球發展到有士碌架、美式16波、中式8波、俄式16波同開侖等等……尤其係士碌架同美式16波或佢嘅衍生品種已成為比賽項目。
歷史
編輯
桌球運動嘅起源眾說紛紜，所以好難定到喺邊度，但最早喺16世紀出現。嗰時呢項運動嗌成「男人嘅遊戲」，但凈得有錢佬嘅家庭先至玩得，而且都幾流行下。
源自法國
編輯1904年，美國人道遜喺佢著作話法王查理七世時期有桌球出現。而且個名早喺15世紀喺法國出現。由於法王路易十四嘅禦醫建議國王餐後做桌球活動嚟方便健身，所以先至畀法王鍾意同關心咗。到咗17世紀，桌球逐漸喺法國開始流行。
源自英國
編輯公元19世紀嘅英國英格蘭維多利亞女王年代，有好多人關注咗桌球，喺啲有錢佬屋企入面唔單止有豪華兼講究嘅桌球間，甚至喺玩桌球嗰時有嚴格嘅活動禮節，而呢啲規定時至今日都重用緊。1836年12月，英國唔單止自發成立咗第一間桌球協會，重喺倫敦誕生咗第一張桌球檯同第一間桌球館。
源自中國
編輯英國詩人哥頓喺1674年出嘅一本書入面，寫咗好多桌球史。尤其講到桌球喺十字軍東征時，從東方帶到歐洲嘅一種古老遊戲，之後經意大利同西班牙改造過嘅。
用品
編輯檯
編輯
據作家同史學家亨德列斯考察過，世界第一張桌球檯喺公元1400年出現，嗰時啲桌球檯冇袋，得拱門或柱門。後嚟啲人喺檯中間開咗個圓窿，跟住喺檯嘅四隻角各開咗個窿。由於啲窿數多咗，所以搞到啲人開始諗到點玩波，直到喺檯開咗6個窿為止先至演變成而家嘅落袋式桌球檯。
球棍
編輯最早嘅球棍可以追溯到16世紀初嘅歐洲，嗰時用嘅係代表權貴同突出皇室家族意義嘅權杖。18世紀中葉凈係皇公貴族嘅娛樂活動，之後逐漸喺大眾開始流行。桌球桿都睇啱嗰時嘅桌球運動發展而開始咗佢嘅生產，尤其係幫皇公貴族整嘅球棍，重鑲咗金銀珠寶、特殊木材同稀有石材（連鑽石都唔例外）等名貴材質嚟突出尊貴同藝術性。
十九世紀之前，美國嘅大多數球棍都喺歐洲進口，同時重將整球桿技術傳到美國一帶。由於有好多人工整嘅球棍出廠，所以鍾意玩桌球啲人開始唔用公棍，而係用好多種花哩碌啲相嘅手工球棍，重跟埋訂造啲人點玩同打擊性能需求而開始流行，結果球棍按消費者嘅需求，要整啲比較人性化嘅球棍（例如：重量、長度、前截軟硬度、前截直徑幅度、握把直徑、綁線方式、先角材質、接合型式、鑲嵌材質……）。嗰時重有啲人因為整球棍賣到成紅成市，跟住出嗮名都有。
從1929年開始，由於美國國內受當地嘅政局動蕩同第二次世界大戰影響，搞到桌球業開始下滑，發展甚至出現停滯。直到1961年，由於電影《The Hustler》開始熱播，桌球業先至開始重新受關注。先係桌球館開始猛咁開業，跟住球棍業亦重新開始發展。直到1980年為止，球棍已經發展得好犀利，除咗用各種進口同國內嘅木材之外，甚至發展到用返舊時嘅石材、象牙、寶石工藝都整埋上去。尤其喺1986年，由於電影《金錢本色》熱播，球棍重加入咗電腦嘅鐳射雕刻功能，甚至整出好多精細又複雜嘅球棍。
波
編輯桌球最早用嘅波係用木材或黃銅整嘅，後嚟受到印度象牙裝飾品同高級用具啲嘢影響而改用咗象牙。嗰時一隻象牙可以整五個波，結果每年要有幾萬隻象牙先至可以解決咁火熱嘅桌球用波生意。由於桌球啲波嘅質地要好高，加上要夠圓，而且每隻波嘅重同嘥士都一樣。嗰時由於技術水平比較低，要使好多錢先至可以買到噉嘅波，所以得皇室同貴族啲人先至有。直到1868年，由於桌球喺歐美地區發展得好犀利，加上有好多人玩嗰啲波，結果紐約有間桌球公司出咗＄10000徵求象牙波嘅替代品。嗰時美國塑膠工業之父——希日，用化學方法研製咗樹酯桌球，從而大大噉降低咗桌球用波嘅成本。
支架
編輯桌球嘅支架係用嚟將啲波按範圍方便排返好，唔使搞到點排而立立亂。呢種用具一般喺開檯或打完一場後開下一場嗰時成日用到佢。佢嘅樣大多數係圓角三角形品種。
戳粉
編輯
戳粉係一種搽喺波棍尖嚟加強波棍同主波之間嘅摩擦。一般用滑石粉嚟整成正方體噉，中間有條凹槽。成分雖然同粉筆一樣，但佢有分橙色同淡綠白色兩種。一般嚟講，士碌架用嘅係淡綠白色品種，比較乾燥；而美式16波用嘅係藍色品種，比較濕啲。呢種粉係由威廉·A·史編克斯同威廉·荷士堅斯喺1897年發明嘅[1]。
玩法嘅發展
編輯開侖
編輯桌球喺1510年喺法國出現，嗰時法國國王路易十四喺凡爾賽宮玩嘅單波（Single Pool）品種。原理係喺張檯放個象牙拱門條象牙立柱，跟住用匙羹樣嘅棍豰個波入去門入面或撞到個柱就有分。最初得兩隻波，到咗1775年時加多隻紅波，之後英國人有樣學樣，搞到波檯有三個波，重將呢種玩法嗌成開侖。而家桌球界重有呢種玩法。
美式桌球
編輯美式桌球係西班牙佬喺1504年傳入佛羅里達州。英國佬又喺1607年將桌球帶到維珍尼亞州。1690年，移咗民嚟南卡羅來納州住嘅法國佬亦將桌球運動帶到美國。嗰時雖然有好多歐洲國家將桌球運動傳入美國，但未得到好快發展，直到1800年之後先至開始流行。經過好多年嘅研究發展，到咗19世紀中葉，由於桌球嘅技術、比賽方法同規則等方面，都出現咗好大嘅改良同完善，而家佢同士碌架一齊風靡全球各地。時至今日，美式桌球已經發展到有16波、9號波、10號波等等一系列玩法。
士碌架
編輯士碌架喺1875年由住喺印度嘅英國軍官——尼維爾·鮑斯·張伯倫（Neville Bowes Chamberlain）同佢班觀音兵發明出嚟。喺佢出世之前，早就有好多種唔同嘅桌球玩法。但有種嗌Black Pool嘅玩法成日喺張伯倫嘅軍隊玩。就係用1隻白波，15隻紅波同1隻黑波。點知有日，張伯倫同佢班觀音兵覺得噉玩落去好悶而決定加黃、綠、粉紅三隻彩波；但無耐又加多咗隻啡同藍波。結果形成咗而家風靡全球各地嘅士碌架。個名出喺尼維爾張伯倫嘅順口簧[註 1]。
註
編輯- ↑ 因爲英文單詞嘅snooker係snook嘅變形，加上英國嗰邊通常將snook講成cock，帶有一定嘅貶義性。詳細解釋請去維基辭典。
攷
編輯- ↑ "The World's Most Tragic Man Is the One Who Never Starts" 互聯網檔案館嘅歸檔，歸檔日期2006年8月25號，., Clark, Neil M.; originally published in The American magazine, May 1927; republished in hotwire: The Newsletter of the Toaster Museum Foundation, vol. 3, no. 3, online edition. Retrieved February 24, 2007. The piece is largely an interview of Hoskins.
