棕地 (香港)

棕地喺香港，跟政府嘅定義，係指新界鄉郊地區入面有工業活動嘅農地，通常相對平坦同比較容易到^[1]。棕地上面嘅工業活動包括露天貯物、港口後勤設施、工業工場、物流作業、回收場、建造機械同物料貯存等等，多數都唔配合周圍嘅環境^[1]。

根據2018年土地供應專責小組調查結果顯示，香港社會主流民意都希望可以善用棕地^[2]。政府話喺洪水橋同元朗南嘅棕地可提供大約629公頃嘅可發展土地，可以起86,100個住宅單位，佔政府未來10年提供48萬個單位嘅目標嘅17.9%^[1]。不過，唔少社會人士都批評政府對發展棕地唔夠積極，寧願發展綠化用地同非原居民村，都唔敢郁棕地^[3]。