楊修粵拼joeng4 sau1175年219年),字德祖,弘農華陰(即依家陝西華陰東)人,出身高門士族,係東漢末年丞相曹操主簿

楊修

生平

楊修出身於弘農楊氏,係袁術外甥,太尉楊彪個仔。

建安時期獲舉孝廉,曾經出任郎中,之後升任曹操嘅主簿。當時曹操軍事繁忙,楊修幫佢處理負責內外嘅事,都符合曹操嘅心意;《世說新語‧捷悟篇》就話楊修好醒目,佢分別解出闊門事件(曹操將「活」字寫落個門到,嫌道門太闊)、一合酥事件(曹操寫「合」一隻字落個盒到,想將合酥分畀大家食)、「絕妙好辭」(一日楊同曹經過曹娥碑,將上面嘅八字謎解出成絕妙好辭)同埋竹椑楯事件(曹操想將剩底嘅竹片做成竹椑楯),連曹操都讚過佢嘅才華。

可能因為咁,陳王曹植因而想巴結佢。開頭兩人關係非常好,但其後因為楊修作答十幾條答教,令到佢對答如流,呢件事無耐就穿煲、畀曹操知道。曹操認為楊修一個外人竟然介入自己屋企嘅事,極之嬲,開始想殺咗楊修。

楊修才華橫溢,生前作有賦、頌、碑、讚、詩、哀辭、表、記、書合共十五篇,其中代表作有《節遊賦》、《神女賦》、《孔雀賦》。

內文:楊修之死

據《三國演義》嘅講法,楊修因為太過聰明,令曹操產生妒忌,想考佢嘅事件,一次又一次噉俾楊修解開,搞到曹操好嬲,早就有殺咗佢嘅諗頭。響漢中之戰入面,楊修跟隨出征,由暗號「雞肋」入面估到曹操有意退兵,於是就叫隨行軍士收拾行裝,準備歸程。曹操瞓唔著於是就夜巡營寨,見到咁嘅情況就嚇親,得知係楊修搞嘅鬼,非常嬲,所以就以「亂軍心」殺咗楊修。

但係據《三國志·魏志·陳思王植傳》、《後漢書·楊震傳附玄孫修傳》、《魏略》同埋《續漢書》,就話雞肋一事雖然的確係真實存在,響219年嘅夏天曹操真係有退過兵、當時亦正值漢中之戰,但雞肋一事並唔係佢死嘅真正原因:真正原因係219年嘅秋天,楊修響飲醉酒之後無端端自己走入司馬門 (即王宮 )、仲要亂咁指控宗室將軍曹彰 ,因而畀曹操以「前後漏泄言教,交關諸侯」斬頭。楊修響死前講過一句:「我固自以死之晚也。」呢句說話證實連楊修本人都知自己瀨咗嘢(似係暗示曹植),並唔係好似《三國演義》所講嘅連自己得罪曹操都唔知。

雖然《三國演義》嘅講法最廣為人知,但由於《三國演義》始終係小說,加上唔少內容亦畀人證實過係同史實不符,所以「楊修死於雞助一事」真實性存疑,《三國志》嘅版本似乎更加接近楊修死嘅真正原因。不過可以確定嘅係,楊修雖然好叻仔、但高調嘅作風早就得罪曹操,最終響219年畀曹操殺咗,終年45歲。

屋企

楊修個仔楊嚻泰始年間曾經出任典軍將軍,早死。個孫楊准,又叫楊淮,晉惠帝後期曾經出任冀州刺史。