楊修之死

楊修之死（粵拼：joeng4 sau1 zi1 sei2），指係楊修被曹操處死嘅事件。喺建安二十四年（219年）秋，楊修同曹植醉闖司馬門誹謗曹彰被人舉報，曹操藉呢機會處死楊修。

《三國演義》描述

喺毛版《三國演義》第72回：《諸葛亮智取漢中 曹阿瞞兵退斜谷》。講楊修因為太過聰明，令曹操產生妒忌，曹操想考楊修嘅事件，一次又一次噉俾楊修解開，搞到曹操好嬲，所以曹操趁機會用雞肋事件令楊修跌落陷阱，以亂軍之罪將楊修處死，所以聰明反被聰明誤。

事件

篇文以倒敘法寫成，開頭先提及最後嘅雞肋事件，之後再由第一件事闊門事件開始，楊修每解開一件事件，曹操嘅怒氣每次都比上一次增強，楊修因為以下事件激嬲曹操：

事件	起因	經過	曹操反應
最後事件： 雞肋事件	曹操帶兵，被馬超拒守，雙方相持不下，進退維谷，成晚正為咗應唔應該撤兵嘅問題而困擾，咁啱庖官送上雞湯，曹操見湯中有雞肋，就以「雞肋」作為呢晚嘅暗號。	楊修聽聞暗號係「雞肋」，估到曹操心意，就叫隨行軍士收拾行裝，準備歸程。當晚曹操睏唔到，夜巡營寨，見寨內軍士都已經準備好行裝，大驚，急召夏侯惇查詢，發現因為楊修對人謂魏王有欲歸之意。曹操好嬲，質問楊修，楊修以雞肋之意向曹操解釋。	曹操好嬲，以造謠惑亂軍心嘅罪名，斬殺楊修。
事件一： 闊門事件	曹操喺新起好嘅花園門上寫咗一個「活」字，其他人都唔明白佢嘅意思。	楊修指出曹操嫌園門太闊，於是改建花園，完成後請曹操去睇。	曹操好開心，但當佢知道係楊修明白佢嘅心意之後，表面雖然話好，心裏面其實忌僤。
事件二： 一盒酥事件	曹操喺塞北送嚟嘅酥盒上面寫咗「一合酥」三個字，放喺案頭。	楊修攞羹匙同大家將盒酥分嚟食晒，並向曹操解釋盒上面寫住「一人一口酥」，所以唔敢違反丞相嘅命令。	曹操雖然喜笑，但係心中厭惡楊修。
事件三： 夢中殺人事件	曹操驚有人謀害自己，喺熟睡嘅時候遭人刺殺，所以吩咐左右喺佢熟睡嘅時候唔好走近。	曹操睏晏覺嘅時候被掉咗落地，一名侍衛慌忙執起被幫佢冚返，曹操跳起並拔劍斬殺咗呢位侍衛，然後再到牀上睏，好耐先起身，醒咗之後扮到好驚問邊個殺咗佢嘅侍衛。	楊修喺被殺侍衛下葬嘅時候，暗示自己洞悉曹操殺侍衛嘅用意，點破曹操殺人嘅詭計，令到曹操更加憎惡佢。
事件四： 吳質事件	曹操想立曹植為世子，曹丕知道咗，秘密請吳質入府密謀對策。	曹丕用大竹筐收藏吳質，私入府中，楊修知道咗，就向曹操告密，曹操乃派人喺曹丕府外偵察。曹丕知道曹操對佢有所懷疑，話畀吳質知，吳質教佢喺第二日再以大竹筐裝絲絹入府，擾亂曹操視聽。	第二日，使者搜查大竹筐，發現果然係絲絹，稟報曹操。曹操因此懷疑楊修存心誣衊曹丕，就更加討厭楊修。
事件五： 鄴門事件	曹操想試曹丕同曹植嘅才幹，令佢哋各自出鄴城門，但暗中吩咐門吏，唔好俾佢哋出城門。	曹丕先行，門吏阻擋，曹丕嚇到退返。曹植知道就向楊修請教。楊修教曹植斬殺阻擋佢出城嘅鄭城門吏。	曹植斬咗阻擋佢嘅鄴城門吏，曹操以為曹植決斷，後來知道係楊修教佢，令到曹操好嬲。
事件六： 答教事件	曹操想試曹丕同曹植嘅才幹，曹操考問曹植嘅軍政知識	楊修為曹植作答十幾條答教，令到佢對答如流。曹操心中有所懷疑。	後來曹丕暗中買通咗曹植嘅左右手，偷咗答教。有人報告曹操，曹操知道之後極之嬲，想殺咗楊修。

反應

正面

《三國演義》作者羅貫中以呢件事告誡後世人，如果做人下屬，要事事小心，唔好似楊修咁自作聰明，累死自己。現代唔少人都攞呢樣嘢嚟警惕職場人士，要識得睇老細做事。

有人認為楊修並唔係因為太過聰明令曹操妒忌，而係因為佢介入王儲之爭（曹丕同曹植之間嘅王位爭奪戰）、曹操覺得佢多事到連自己屋企嘅嘢都管埋，因而借雞助一事殺咗佢。

仲有人認為係因為楊修出身於弘農楊氏、遠比曹操高貴，士人嘅出身就已經令曹操提防到死下死下（死響曹操手上嘅孔融、崔琰，其實都係士人出身），再加上楊修唔識得低調，先至搞到畀人斬頭。

反面

不過《三國演義》嘅講法同好多歷史書有出入，《三國演義》話係楊修太過自作聰明、因而畀曹操以「亂軍心」斬頭；而《三國志·魏志·陳思王植傳》等等就話楊修係因為飲醉酒之後自己走入司馬門（即王宮）、仲要亂咁指控曹彰，因而畀曹操以「前後漏泄言教，交關諸侯」斬頭，雞肋一事雖然發生過，但唔係佢死嘅最終原因。由於《三國演義》只係小說，好多嘢都畀人證實係同史實不符，所以楊修之死真實性存疑。

註

攷

出面網頁

• 楊修之死原文
• 楊修之死 文句理解（上）
• 楊修之死 文句理解（下）