楊箕

楊箕（注意「楊」字有地名變音，讀點樣嘅「樣」，粵拼：joeng2 gei1）係中國廣東廣州嘅地名，亦係越秀區東南角嘅一條自然村，西靠梅花村；東靠廣州大道中；南靠寺右；北靠中山一路。村姓姚、秦、李、梁。

楊箕嘅北牌坊

個村有時俾廣州當地啲外人嗌佢做「養雞」，但實質個村冇人養雞。

名

個村因為俾珠江水沖積而形成似民间篩米用嘅箕而改成簸箕里。1930年代因河南西邊嘅新滘亦有隻同名嘅村導致郵件成日投遞出錯，加上嗰時沙河涌兩邊有好多間楊桃園出咗好多香甜嘅楊桃而決定改名做楊箕。

史

個村喺大宋天禧三年（1020年）開村，嗰時嚿地屬永泰鄉，周邊係嚿河灘同亂墩，後嚟俾珠江水沖積成嚿地出嚟。初期時嗌簸箕里，後嚟因同河南西邊嘅村撞名而喺1930年改名做楊箕。初期時個村範圍，北到沙河一帶；南到珠江邊；東到天河村周邊，1978年因廣州市煤氣公司（今日嘅廣州燃氣集團）搬入而徵咗環市路周邊一帶田地；1980年初因中山一路、梅花路、水蔭路等一帶被徵做其它用途；令個村縮到北邊凈去到中山一路一帶；1984年因開發五羊新城而徵咗一部分用地，南邊亦縮水到去到寺右村附近；1992年因珠江新城搞規劃區，東邊亦縮水到廣州大道中嗰頭。喺村落被徵地嗰時，村入面有好多3～4層樓啲建築拔地而起，加上嗰時冇統一規劃，而且啲街巷超多彎，加上每棟樓之間有好多陽臺都係對向而形成大量握手樓同連體樓嘅情況，重形成咗大量「一線天」嘅城中村特有景觀。從1993年開始，當地村民又喺海珠區同天河區、黃埔區一帶先後買地開咗好多新工業園區，同臺商搞合作嚟整鞋等工業而成為廣州第一個億文村。不過好景唔長，2011年6月因成個城中村大改造，原先嘅舊祠堂同入面啲村屋除玉虛宮外，冚唪唥都拆嗮，而祠堂都統一搬到玉虛宮隔籬嗰邊重新起返出嚟。2017年初回遷嗰時，因網上資訊比較發達，喺廣州地區成日流傳咗「嫁個楊箕佬，生活乜嘢都變好」嘅短句講法。

神廟

名	位	始建	重修、重建
玉虛宮	泰興直街	明朝	1721、1754、1799、1805、1842、1901、1936、1989、2016
玉虛宮 （北帝行宮）	雄鎮四橫巷15號	1753	1994

祠堂

姓氏	名	堂號	位
姚	姚氏大宗祠 （禮庭祖）	鳳儀堂	雄鎮大街
	兩山姚公祠		泰來大街10號
	君達祖廳	吉興堂	大巷直街
	姚氏宗祠 （竹芳祖）		雄鎮大街56號
秦	秦氏宗祠	萬石堂	雄鎮一橫巷8號
	秦公祠	福成堂
梁	貴明祖梁公祠 （梁氏大宗祠）	永裕堂	雄鎮四橫巷12號
	十世祖祠	富福堂	雄鎮坊東勝里
李	李氏大宗祠	耕道堂	西約
	二世祖	紫氣堂
	文明家塾 （三世祖）		光善里1號
	永興家塾 （四世祖）	永興堂	星垣南直街3號
	敬齋家塾 （七世祖）		長庚直街22號

連出去

• 杨箕村，900年古村落的最后时光 网易房产