樞紐

樞紐（粵音：syu1 nau5；英文：Hub）係一個網絡科學嘅概念，就係喺一個網絡入面，啲連結零舍多或者重要過人嘅網絡節點。因為佢嘅連結比正常多或者重要，所以樞紐對成個網絡嘅運作，都唔成比例地有影響力。對於社交網絡，只要個網絡唔係隨機（即係有意識地計劃同參與），個網絡就會因為 Preferential attachment 嘅緣故，自然咁產生樞紐。所以，喺現實世界嘅好多唔同模式嘅網絡，包括互聯網同腦網絡，都會出現到樞紐。

一個人嘅腦入面嘅連結；樞紐 highlight 咗

截至2005年1月，互聯網嘅其中一部分嘅所有連結；樞紐同樣 highlight 咗

計算方法

為咗方便量度，一個網絡入面嘅網絡節點，都會有一個度數，嚟計佢總共有幾多個連結；連結越多，度數就越大。對於樞紐嚟講，佢嘅度數會係比其他節點嘅度數大，因為佢同其他節點有嘅連結多。因為樞紐唔能夠喺一個隨機嘅網絡度出現，所以一個網絡有冇樞紐，就能夠睇得出個網絡係唔係隨機。