樣本大細

樣本大細（粵拼：joeng6 bun2 daai6 sai3；英文：sample size）係指一個樣本入面嘅個體數量。喺統計學上，樣本大細要點樣決定係一個重要課題。

喺現實應用上，因為人力物力限制，研究者往往冇辦法做到「樣本有咁大得咁大」，不過會起碼想啲樣本「有返咁上下大」，仲會有啲特定嘅式，用嚟計「樣本最少要係幾大」。

點解重要

睇埋：統計自由度同統計功效

喺廿一世紀初嘅統計學應用當中，樣本大細係一個相當重要嘅數值。啲人做親統計分析，基本實會睇睇場分析用嗰個樣本有幾大。如果一場分析樣本細，就表示手上嘅資訊量少，而呢點就表示分析者對於「呢場測試係咪真係能夠探測到實質存在嘅效果」（統計功效）存疑。