機械翻譯譯後編輯

機械翻譯譯後編輯（行內簡寫 MTPE），簡稱後編（英文：post-editing，行內簡寫 PE），喺翻譯界，係指做完機械翻譯之後人手執手尾嘅工序，亦即係將好多時係唔通順、錯標點、甚至譯錯嘅機械翻譯執到變返做通順同冇譯錯嘅嘢；｢後編｣ 係翻譯社嘅叫法，原則上其實即係比較編輯（comparative edit），只係呢種比較編輯係限於電腦寫而唔係人寫嘅文。

喺2023年，後編已經唔再局限於執傳統翻譯軟體嘅手尾，執嘅亦可能係例如 ChatGPT 等等嘅大型語言模型譯出嚟嘅嘢。

後編可以再根據要做幾多嘢，再細分做略略改（light PE）同全面改（full PE）兩大類，前者指做最少嘅改動，令譯文文法冇錯、意思冇錯、冇錯別字，其實亦即係編輯界講嘅文字編輯（copy editing），而後者就接近編輯界講嘅文風編輯（stylistic editing），但係因為翻譯界同編輯界好大程度上並唔重叠，翻譯界用咗唔同嘅字眼講同一樣嘅概念。

後編喺翻譯界頗受爭議，其中一個原因係翻譯社認為電腦已經譯咗，所以理應唔使做咁多嘢，可以壓價，但係其實好多時因為電腦譯得好差，儘量唔改反而要做更多嘢；又或者有啲翻譯員認為如果做後編，會令翻譯社認為機械翻譯再做後編係可行方案，繼而減少用人手翻譯，等等。