檳威大橋

檳威大橋（又叫檳城大橋；馬來話：Jambatan Pulau Pinang）係馬來西亞檳城州嘅跨海大橋，同時亦係檳城州嘅出名地標。呢條長達13.5公里嘅大橋連接檳城州檳島同對岸威省（請見圖），屬於高速路線。檳威大橋同南北大道北段喺威省相接，可以直接通去馬來西亞半島西海岸嘅大小城鎮，甚至北上泰國同南下新加坡。檳威大橋喺1985年9月14號正式通車。1985年之前，渡輪係來往檳島同威省之間嘅主要交通工具。

檳威大橋 Penang Bridge Jambatan Pulau Pinang
載有	6條行車線（3線雙程行車）
跨越	檳威海峽
地點	馬來西亞檳城州 檳島與威省之間
維護單位	南北大道有限公司 檳威大橋私人有限公司
設計結構	斜拉橋、箱形梁橋
最長跨距	225米（738英尺）
總長度	13.5公里（8.4英里）
路面寬度	雙線道18.75米（61.52英尺）、3線道25.75米（84.48英尺）（每條車道寬3.75米（12.30英尺））
最高高度	101.5米（333.0英尺）
橋下淨空	33米（108英尺）
開工日期	1982年
完工日期	1985年
通車日期	1985年9月14號
過橋費1	依交通類型分為七個等級，馬幣1.40至75.00令吉不等
別名	檳城大橋
經緯度	5°21′14″N 100°20′47″E

出口

威省路段

• EXIT 3601A：進入南北大道，北上可以去北海、居林、吉打、泰國等地；南下可以去武吉淡汶、高淵、霹靂、吉隆坡同新加坡等地。
• EXIT 3601B：進入北賴工業區道路（Jalan Perusahaan Perai），可前往北賴工業區同柔府。

檳島路段

• EXIT 3602A：進入敦林蒼祐大道南部路段，可以去皇后灣廣場、峇都茅、峇六拜國際機場、峇六拜第四工業區同第三工業區。
• EXIT 3602B：進入蘇丹阿茲蘭莎大道路段，可以去理科大學、牛汝莪、日落洞、峇六拜國際機場同峇六拜工業區。
• EXIT 3602C：可以去敦林蒼祐大道北部路段，前往檳島市中心。

收費

檳威大橋係一座收費橋。所有汽車由威省入檳島都要根據以下收費表畀錢。檳城居民或者喺檳城做嘢嘅人需要向檳威大橋有限公司辦事處買一觸即通卡先至可以享用電子收費。2019年1月1號，檳威大橋電單車道喺馬來西亞財政部長林冠英宣布下正式取消收費。

級別	交通工具	現金收費	電子收費
第一級	電單車（兩輪交通工具）	免費	免費
第二級	汽車、吉普車、多用途汽車 擁有托格嘅電單車、三輪電單車	RM7.00	RM5.60
第三級	擁有兩軸四輪嘅羅里、巴士、貨車	RM12.00	RM9.60
第四級	擁有兩軸五輪或六輪嘅羅里、巴士、貨車	RM25.00	RM20.00
第五級	擁有三軸嘅羅里、巴士、貨車	RM45.00	RM36.00
第六級	擁有四軸嘅羅里、巴士、貨車	RM60.00	RM48.00
第七級	擁有五軸或以上嘅羅里	RM75.00	RM60.00

交通限制

由於繁忙時間交通流量大，所有重型汽車例如第四級或以上羅里喺朝早6點半至8點半期間以及下晝5點至7點期間唔畀進入大橋範圍

另外，行得慢嘅車包括腳車、起重機、挖掘機、擁有托格嘅電單車等喺朝早6點至深夜12點期間都唔畀進入檳威大橋範圍。

特許經營權

政府同Mekar Idaman喺1993年簽署特許經營合約，畀呢間公司經營檳威大橋，有效期由1993年9月30號去到2018年5月31號。呢份合約包括保證無論喺任何情況下可以喺1998年之後每年增加2%過路費，而如果政府拒絕調漲，政府必須作出賠償。

2011年，政府同Mekar Idaman母公司南北大道有限公司達成協議，檳威大橋將唔會調漲，同時合約延長至2038年。

大件事

呢條橋多年嚟成日有交通意外發生 ，亦有多宗跳橋自殺事件。

檳威大橋國際馬拉松賽

檳威大橋國際馬拉松賽（Penang Bridge International Marathon）係檳城年度盛事。1986年嗰時比賽叫「大橋跑」，由馬來西亞理科大學做起點，經繞過大橋之後返到起點，全程大約21.0975公里。後期1990年代敦林蒼祐大道亦納入跑程，先有馬拉松比賽。

2008年開始，檳威大橋馬拉松賽喺皇后灣廣場做起點同終點，參賽人數一年比一年多。2008年報名參賽人數有1萬7000人，2009年報名參賽人數則有1萬9000人，2010年報名參賽人數已經達到2萬4000人。2011年報名參賽人數更加創新高，有2萬7500人，畀大馬記錄大全列做「大馬數量最多參賽者的最大型馬拉松賽」。

檳城政府宣佈2012年檳威大橋馬拉松賽將會係最後一年舉辦，並喺2013年移師到檳城第二大橋舉辦；不過基於第二大橋延期竣工，2013年檳城大橋國際馬拉松賽最終喺返檳威大橋舉行，日期為2013年11月17號。

睇埋

• 檳威二橋