歌連臣角懲教所（英文：Cape Collinson Correctional Institution）係香港懲教署轄下嘅一間低度設防懲教所（教導所），位於香港柴灣歌連臣角道123號，喺1958年投入服務，收容喺《教導所條例》受訓嘅男性青少年。
懲教所雖然用「歌連臣角」呢個海角嚟命名，但純粹只係因為坐落喺歌連臣角道，懲教所本身同歌連臣角相隔約莫有1.3公里。懲教所位處嘅地方叫草堆灣，草堆灣西南就已經係大浪灣，但大浪灣無路通到去懲教所。
