歐豬五國

歐豬五國（英文：PIIGS）又叫黑豬五國、甘豬五國、笨豬五國或五小豬國，係國際債券分析員、學者同埋國際財經界媒體對歐洲五個較弱嘅經濟體系嘅貶稱。

PIIGS歐豬五國

歷史

呢個名最早由美國《新聞周刊》嘅專欄作家Juliane Von Reppert-Bismarck喺2008年7月7號發行嘅雜誌上刊登嘅文章《點解豬飛唔起》（Why Pigs Can't Fly）使用，本來淨係指南歐四國：葡萄牙（Portugal）、意大利（Italy）、希臘（Greece）、西班牙（Spain）呢四個國家組成嘅非正式經濟體。由於呢四個國家文化傳統、地理位置比較接近，而且最近幾年經濟增長停滯不前，失業率高，又有財赤，而四個國家嘅字頭又啱啱好可以砌成一個"PIGS"字，所以好多人將佢哋擺埋一齊講。後來連愛爾蘭（Ireland）嘅經濟都開始出問題，同樣面對財政赤字，所以佢哋將愛爾蘭歸埋入去，令歐豬四國變成歐豬五國（PIIGS）。

變種

PIIGGS歐豬六國

除咗黑豬五國之外，亦有人連英國（Great Britain）都擠埋入去，叫佢哋做歐豬六國（PIIGGS）；但同其他幾個國家唔同嘅係，縱使英國同其他五國遭遇金融危機，但整體嚟講，英國嘅銀行體系都好過其餘五個國家。另外，英國雖然曾經係歐盟嘅一份子，但由於英國無取消英鎊加入歐元區，所以相比其他黑豬五國，英國嘅財政暫時重未發生咩嘢大麻煩。

另一方面，最近匈牙利政府亦都語出驚人咁話，自身財政同希臘一樣面臨重大危機，引發全球股市恐慌。但係財經專家話，將匈牙利講到好似希臘咁樣發生嚴重金融危機有尐過火，除咗係因為匈牙利重未加入歐元區之外，匈牙利本身嘅財政狀況其實係好過晒歐豬五國嘅。不過為咗避免危機發生，國際貨幣組織已經派人去匈牙利進行調查。

睇埋

• 金磚四國（BRIC）
• 展望五國（VISTA）
• 地中海聯盟
• 歐元區

參考

• 金磚四國後的「黑豬四國」