傷殘奧林匹克運動會

傷殘奧林匹克運動會（粵拼：soeng1 caan4 ou3 lam4 pat1 hak1 waan6 dung6 wui6*2，大陸叫殘疾人奧林匹克運動會，臺灣叫帕拉林匹克運動會），係現代奧林匹克運動會嘅分支活動，專畀傷殘人士運動員參加。

傷殘奧林匹克運動會標誌

1960年開始，傷殘奧林匹克運動會開始跟住夏季奧運之後搞，1976年開始搞埋冬季版。

歷史

經歷咗第一次世界大戰同埋第二次世界大戰之後，全球出現咗唔少殘障軍民，一次大戰結束後，復康治療漸漸被重視，為咗減少因為肢體傷殘所帶嚟嘅影響，呢啲傷殘人士開始接受體能訓練，從運動中幫助復康同埋回復自信。

1948年，有一位叫做盧域·格特曼嘅醫生喺英倫為二次大戰時嘅脊髓損傷軍人組織咗一個運動競賽團體，四年之後，荷蘭開始有參加者加入咗呢個運動會。呢個就係傷殘奧運會嘅起源：史篤曼維爾運動會（即係而家嘅世界輪椅運動會）。

需要留意嘅係，國際殘疾人奧林匹克委員會喺2001年6月19號同國際奧林匹克委員會簽署協議，授權由國際奧委會決定主辦權係邊個；另一方面，一旦獲選為奧運會主辦城市，一定要兼辦傷殘奧運會，即係同時攞到奧運會、傷殘奧運會（兩個運動會）嘅主辦權。而且喺奧運結束後，一定要喺幾個禮拜內搞掂晒傷殘奧運會嘅大小事務，以趕上傷殘奧運會嘅開幕儀式。