民選港姐冠軍,簡稱民選港姐,係香港坊間同傳媒用到嘅稱呼,指喺參選香港小姐廣受觀眾歡迎但最後落選嘅佳麗。歷嚟有三位女藝人有呢個稱號,分別係2012年嘅朱千雪[1]、2014年嘅吳海昕(前名吳凱欣)[2]同埋2017年嘅伍樂怡[3]

緣由 編輯

朱千雪(2012年) 編輯

2012年度香港小姐競選,無綫電視原定只由評判選出最後三強,再由觀眾透過流動應用程式「一人一票」選出冠亞季名次。嗰屆大熱門朱千雪亦順利入咗最後三強。不過無綫電視話伺服器出現擠塞,所以臨時取消觀眾投票環節,改由評判決定名次,朱千雪最後只係得季軍。網民戥佢唔抵,認為如果有得投票,佢實攞冠軍,所以叫佢做「民選港姐冠軍」[1]

吳海昕(2014年) 編輯

2014年度香港小姐競選,賽制同之前相似,都係由評判選出最後三強,再由觀眾投票選出冠亞季名次。嗰屆大熱門吳海昕(嗰時叫吳凱欣)最終無喺最後三強名單出現,只係攞旅遊大使獎。賽果再度引起網上聲音批評,又將吳海昕封做「民選港姐冠軍」[2]

伍樂怡(2017年) 編輯

2017年度香港小姐競選,未有觀眾投票決定冠亞季名次安排,只係可以投「big big channel最受歡迎香港小姐」獎。嗰屆大熱門伍樂怡最終五強止步,入唔到最後三強。網上再一次出現批評賽果嘅聲音,同埋叫伍樂怡做「民選港姐冠軍」[3]

參考 編輯

  1. 1.0 1.1 【民選港姐】千雪BB係怎樣煉成嘅?
  2. 2.0 2.1 【港姐】專訪大熱落選「民選港姐」吳海昕:傾家蕩產都要做演員!
  3. 3.0 3.1 . 原著喺2020年3月27號歸檔. 喺2020年2月29號搵到.