水口

水口（粵拼：seui2 hau2）係香港大嶼山一地方，喺石壁同塘福之間。水口以東海灣名為水口灣，而喺水口以南半島名為水口半島。喺水口區內嘅水口村係一條小村落，由卅幾間房屋組成，喺鳳凰徑第九段尾。

因為風向同地理關係，水口係香港最多紙鷂滑水（Kiteboarding）愛好者遊樂嘅地方，亦係最適合紙鷂滑水初學者地方。另外，因為佢地理位置屬於光害比較少嘅範圍，特別係村落以南通往籮箕灣嘅一段鳳凰徑小路，因此成為香港其中一個熱門觀星地點。香港天文學會喺呢度設立水口觀測站，並且設置天文望遠鏡，為會員提供理想同舒適嘅天文觀測地點^[1]。

2015年，大嶼山發展諮詢委員會討論南大嶼山嘅康樂同旅遊發展，包括建議喺水口半島設立野生動物園^[2]。