永利澳門

  提示：呢篇文講嘅唔係利澳酒店。

  呢篇文講一座賭場及酒店建築物。想搵其所屬公司嘅話，請睇永利澳門有限公司。

永利澳門（英文：Wynn Macau）係澳門一座酒店兼賭場，响2006年9月6號開張，連埋到咗2010年4月21號開幕嘅部分，一共設1,004間客房。呢個架步屬於永利澳門有限公司，位於路氹城；入面唔止有永利澳門娛樂場（英文：Casino Wynn Macau），重開咗水療中心、美髮中心、餐廳、零售舖頭……

永利澳門

爭議

派彩比率被指過低兼收埋相關數據

綜合2009年5月5號《東周刊》及同月8號《頭條日報》嘅消息：
化名譚女士嘅浙江建築材料商人，响2009年5月1號，喺永利賭場貴賓廳大手筆打老虎機，輸咗多於五千三百萬港紙。佢發覺中彩次數極少，深感奇怪。翌日，譚女士揾嚟三個朋友，聯手投注另外廿部機，實行押重注大包圍，務求翻本。點知玩咗二十多分鐘，職員忽然之間郁手停咗佢哋機，重將現金券同積分卡攞埋出嚟，只准每人玩兩部，佢哋唯有谷住啖氣走人，譚女士亦更加覺得賭場可疑。佢之後要求永利公開道歉同賠償，以及交出佢打咗三個月嗰部機嘅呑吐紀錄，以便計數，揾出佢係噉輸錢嘅原因，係唔係機器有問題——派彩率設得太低。然而對方畀嘅只有派彩資料，冇投注嗰部分，又欠奉解釋。佢於是有為此告上法庭嘅準備。兩日之後，譚女士又返去打老虎機，中咗次五百萬港紙嘅「jackpot」；雖然翻唔到本，但似乎出咗口氣。然而佢聲言冇放棄用以上方法追究。