沉默

  想搵第二個意思嘅話，請睇沉默 (搞清楚)。

沉默（粵音：cam4 mak6），又叫肅靜，係指一個人唔講嘢，保持靜嘅狀態。沉默通常響一啲儀式，或者響需要靜嘅場所（譬如圖書館、戲院、演藝廳）出現。

保持沉默嘅標誌

文化

喺好多文化當中，如果兩個人雙方都粒聲唔出，個情景係會好令人唔舒服同尷尬嘅。因此，好多人都鍾意打下牙骹講下啲濕碎嘢，避免沉默嘅情況，而且打牙骹嘅人仲可以等待更「實質有用」嘅話題出現。

古時中國覺得沉默係美德，俗語有話沉默是金（粵化：沉默係金）。

亦有部分歐美地區被指係缺乏傾閒偈嘅文化，鍾意咩都唔講多過打牙骹「傾埋晒啲無謂嘢」，譬如歐洲北部嘅瑞典同芬蘭就係噉。當中芬蘭話就有一句諺語，被指係清楚表明咗芬蘭人嘅態度：

芬蘭話：Sanottu sana hopeaa, sanomaton kultaa.
粵語版：講咗出嚟嘅言詞似銀，冇講出嚟嘅（言詞）似金。
言下之意：唔講出嚟嘅嘢更寶貴。