洪洞大槐樹移民

 洪洞大槐樹移民（粵拼：hung4 tung4 daai6 waai4 syu6 ji4 man4） （洞讀同）係明初政府將山西人強制移民到華北（河南、山東、安徽、河北）嘅移民潮。據《明實錄》，強制移民持續約50年（洪武六年到永樂十五年），合計有18次，其中洪武年間10次，永樂年間8次，遷出人口過百萬。清末時移民後裔遍佈全國，佢哋啲後裔嘅族譜都記低呢段歷史；今日華北人都認山西洪洞大槐樹做祖地，話「問我祖先來何處，山西洪洞大槐樹，問我祖地在何方，山西洪洞老鸛窩」。

背景

中原蕭條

六百幾年前嘅元末明初，華北地方曾經荒無人煙，首先元末時河南、安徽、山東一帶黃河水災、旱災、蝗災、瘟疫多多，之後係元末戰亂，死咗好多人，甚至「禾不入土人相食」。之後明初有靖難之變，中原地方又係死得人多。至今華北有民間傳說，話明朝開國大將胡大海後生時喺河南乞食，畀當地人侮辱，懷恨在心，功成名就之後就想去河南復仇，朱元璋淨批準佢殺「一箭之地」，點知佢一箭射咗去隻雁嘅尾，隻雁一飛千里，胡大海一路向北殺到河南山東無曬人。呢個傳說就反映嗰時中原地方嘅動亂、蕭條。

山西密人

山西情況唔同其他華北地方，山西有太行山、呂梁山呢啲天險保護，同時有察汗帖木兒、擴廓帖木兒父子據守一方嘅政權，中原嘅天災、戰亂幾乎未波及到呢度，於是有好多外省難民走難呢度，於是山西係當時中國人口最密集嘅地方之一，據《明實錄》，洪武十四年，河北河南兩地各1800萬人，山西有4000幾萬，比河北河南人口總和多出30萬。

強制移民

朱元璋開大明後，爲咗恢復中原，落令將山西人強制移民到中原地方。呢場移民後世嗌做「洪洞大槐樹移民」，其實唔係將洪洞縣啲人全部搬趄，而係洪洞縣做集結、中轉嘅樞紐。洪洞位於晉南平原，農業發達，兼且喺交通要道，自古就設驛站。

當時洪洞縣有間廣濟寺，隔離有樖好大嘅漢代古槐，南北走向嘅驛道就穿過呢樖大槐樹嘅樹蔭。強制移民時，官府喺廣濟寺設辦公點，將移民集中喺樖樹下面，編排好，發外遷證、水腳。唐人重鄉情，啲移民上路之後好唔捨得，於是呢樖大槐樹成為佢哋對鄉下嘅集體記憶。

影響

中原復甦

中原地方復興，發展到今日，河南、山東係中國人口大省，同廣東一樣，人口過億。同時亦都改變咗人口分佈，使山西無咁多人，人口分佈合理咗。

山西文化傳播

山西嘅風俗、語言外傳。風俗上比如寒食節由山西傳到山東、安徽，呢個節係山西人爲咗紀念晉國名臣介子推而設，呢個節要食凍嘢、蒸麪燕。

此外山西嘅語言都外傳，雖然今日河南、河北、山東唔係晉語區，不過當地啲話有啲用詞同山西話相近。

族群形成、認同

洪洞大移民之後，喺華北形成兩支民系：冀魯民系、中原民系，呢兩個族群分別講冀魯官話同中原官話，雖然佢哋有自己嘅族群認同，唔會話自己就係山西人，不過佢哋都追認洪洞槐樹做佢哋嘅祖地，每年洪洞地方都有移民後裔去祭祖。

此後移民後裔繼續擴散，比如闖關東之後形成嘅東北民系，以及華北籍臺灣外省人，佢哋亦都認大槐樹爲祖地。

傳說

• 解手嘅古仔：因為啲人實在唔想強制移民，於是唔少人想走佬，結果啲官兵反綁移民隻手，監佢哋上路，佢哋長時間反綁住，膊頭痹曬，後來行路時歡喜孭埋隻手來行，佢哋啲子孫有樣學樣噉行路。路上肯定有三急，有需要時就嗌監卒「解開隻手」去方便，久而久之就有「解手」呢個詞。
• 腳趾仔嘅古仔：華北有俗話「誰是古槐遷來人，脫履小趾驗甲形」，就話當年爲咗識別移民、防止走鷄，就用斧頭劈啲人隻腳趾仔成兩塊，傷口好返後留笪𤶸（音：naa¹），遺傳畀後人，於是話有隻腳趾仔嘅腳甲分兩塊嘅就係大槐樹移民後裔。查實傷痕唔會遺傳，至於有啲人腳甲仔分兩嚿，祇可講明佢哋基因上有啲共同處，而唔係話係移民後裔。

連出

• 明初山西大槐樹大規模移民遷徙原因
• 洪洞大槐樹移民分佈
• 洪洞大槐樹移民