闖關東

闖關東（粵拼：cong2 gwaan1 dung1）係清代到民國時（19世紀後半期到20世紀前半期）華北漢人湧入東北嘅移民潮，同落南洋、走西口合為清代中國三大移民潮，呢場移民潮大約持續咗100年，到日本戰敗前，移民數超過兩千萬，移民源地主要係山西、河北、山東、河南，其中山東、河北人最多（山東半島），最終遼東以北由滿洲演變爲漢文化區。

字面釋義

「關」係指山海關，「關東」即山海關之東，亦即而家嘅中國東北地區，又叫關外，相比長城以南開發得遲。呢個「關」之所以要「闖」，在於從清初開始，朝廷封禁東北，漢人唔準私自進入，所以講「闖關」，同時，因為封禁，東北直程係未開發，啲人去到嗰度係唔知會遇到咩事，所以又有「闖蕩關東」嘅含義。

背景

滿清封禁滿洲

第一個入關嘅滿洲皇帝係順治，嗰時中原局勢動盪，而南方有明朝勢力要反清復明。北京嘅滿清政權有咩行差踏錯，就可能冧檔，所以佢哋點都要有笪可以退守嘅餘地，即係滿洲。同時滿族喺努爾哈赤之下喺滿洲興起，話滿洲係佢哋嘅「龍興之地」，所以無論係風水，定係軍事戰略，滿洲對滿清係好緊要。

於是順治落令，拍住遼東明長城，挖咗條柳條邊，分隔滿洲同中原。柳條邊係挖出條渠，用挖出嘅泥做堤防，堤上種柳樹編成一排。佢東起遼寧鳳城，西到山海關，駐兵把守，關內人想過要有官府嘅「印票」，呢種印票無乜事唔會發。

到康乾盛世時，滿洲皇帝龍椅坐正，不過重係要封禁滿洲，意在保住滿洲風俗，防止旗人漢化。喺滿洲人睇落，滿洲始終係風水重地，出於保存民族文化、教育，佢哋禁止開田採伐，要保留大量荒野來保持八旗騎射圍獵嘅習俗，於是東北有大笪嘅無人區，開發程度極低。

乾隆喺四十一年（1776年）發過諭令：「盛京、吉林爲本朝龍興之地，若聽流民雜處，殊於滿洲風俗攸關」。自此，封禁滿洲正式納入國家法制，不但加強盤查出關人士，重喺滿洲搜捕私自出關嘅漢人，一經發現立即遣送原籍。就噉以來，喺關外如蒙古族、滿族等少數民族佔比較高嘅人口比率，但人口稀薄。

中原民生多艱

康熙時實行攤丁入畝，取消人頭稅，放鬆咗人口管制，中國人口劇增。百年之內，人口就多出成倍，中國顯得人多地少，而中原尤其嚴重。19世紀時，黃河水患、中原旱災多多，啲人生存艱難。呢陣時，滿洲有大笪地閒置，重係地力好好嘅黑土，走投無路，啲人就唔理禁令，於是中原農民走去闖關東。丁戊奇荒時，啲災民湧去滿洲官府都默許咗，於是更加多人去闖關東。

移民路線

有兩條路線：陸路同海路。

• 陸路：從山海關、喜峰口、古北口等長城各關口出關，入到遼瀋。
• 海路：從山東半島坐船去遼東半島。譬喻從煙臺去大連，一晚船就到。

移民生計

開始時，東北係好有好多荒野，啲農民去到嗰度墾荒，後來發展咗啲村鎮，就開始出現商業，此外東北資源豐富，有啲人去嗰度可以淘金、入山挖蔘（東北話叫「放山」），所以東北當地有諸如「山神」、「金王」呢啲闖蕩傳奇。

後來中國國力衰弱，東北成為俄國勢力範圍，整鐵路、起城市，呢班移民成為東北開發嘅勞力，後來日本勢力侵入東北，成立滿洲國，期間東北工業化，日本人口唔夠中國多，始終需要中國嘅勞力，所以移民重未完全消失。

東北放禁

1860年，中國同沙俄簽《璦琿條約》，俄國攞咗中國嘅外滿洲、庫頁島，時任黑龍江將軍特普欽上疏朝廷，鼓勵移民實邊，於是東北放禁；光緒年間乾脆完全廢除禁令，闖關東達到高潮。

影響

東北地方原本好荒涼，闖關東嘅移民開發咗東北，由荒野變成中國一處重要嘅農業、工業生產地。

滿洲原本係遊牧民族嘅領地，移民基本上填充曬成個東北，變成咗漢文化區，同時移民嘅數量遠遠超過同期嘅俄國、日本、朝鮮移民，喺文化勢力上中國贏咗，達到「實邊」嘅效果，而當時日、俄兩國企圖染指、佔領東北。

同時呢班移民形成咗新嘅文化──東北文化，因為東北自身嘅歷史（諸如滿洲國、開發歷程），佢哋形成咗自我嘅族群認同（東北民系），移民講嘅北方話同滿文、日文、俄文融合，形成咗東北官話，其中開發得比較早嘅遼瀋地方當地口音比較重，越北就越接近普通話。除咗形成新語言，亦散播其他方言：黑龍江有當年河北山東移民帶去嘅冀魯官話語言島；行海路嘅移民將膠遼官話由膠東地方傳到遼東半島，產生登連片、蓋桓片，同時黑龍江分佈咗登連片嘅虎林、二屯子兩個語言島。

相關

• 山東省公務員考試專門出過闖關東嘅考題。
• 大連電視臺喺2008年1月到2月時播出電視劇闖關東，講嘅係山東朱氏因為旱災闖關東歷程。之後CCTV同其他地方臺放過。2009年8月北京衞視、浙江衞視放呢出戲嘅續集《闖關東中篇》。

出面網頁

• 下南洋、走西口和闖關東——清朝三大難民（移民）潮
• 「闖關東」的歷史與文化觀