浸信會沙田圍呂明才小學

浸信會沙田圍呂明才小學（英文：Baptist (Sha Tin Wai) Lui Ming Choi Primary School，簡稱「沙呂小」）係香港一間政府資助全日制男女基督教小學，喺新界沙田圓洲角路8號，呢間學校嘅聯繫中學係浸信會呂明才中學。

學校歷史

浸信會沙田圍呂明才小學源於「香港浸信會第一小學」，之後改名為「培愛小學」。喺1982年，搬到沙田第一城，成為「浸信會呂明才小學上午校」同「浸信會呂明才小學下午校」。喺1999年，「浸信會呂明才小學下午校」再搬到沙田圍而家嘅校舍，成為「浸信會沙田圍呂明才小學」。

2011年，創校校長鄧薇先女士退休，第二任校長由薛鳳鳴女士接任，2019年7月因為遊學團帳目風波而辭職，喺2019年9月1號正式離任^[1]，2019年9月暫時由前副校長溫衍超先生做署理校長。

薛鳳鳴請辭之後，校董會已經展開招聘校長程序，期望可以盡快搵到合適人才繼續領導學校^[2]^[3]。2020年8月12號獲教育局批准，署理校長溫衍超先生，喺2020年9月1號正式擔任校長^[4]。2022年9月1號溫衍超先生退休，尹紹光先生接任校長。