溶劑

溶劑（粵拼：jung4 zai1）係指溶液入面用來溶解溶質嘅物質。溶劑可以係固體、液體、氣體或者超臨界流體，不過通常講嘅溶劑都係液體。水係最常見嘅溶劑，除咗水之外，實際用到嘅大部分溶劑都係有機溶劑。

分類

溶劑可以按分子電偶極矩強弱分成極性溶劑同非極性溶劑兩類。根據相似相溶原理，極性溶劑比較容易溶解極性溶質，非極性溶劑比較容易溶解非極性溶質，反過來就比較難溶。極性溶劑又可以按會唔會發生自電離產生氫離子而進一步分成質子性溶劑同非質子性溶劑。水係典型嘅質子性溶劑。丙酮係實驗室最常用嘅極性非質子性溶劑。

安全性

同安全性關係最密切嘅溶劑性質包括揮發性、可（易）燃性同毒性。大部分有機溶劑都可燃或者易燃。低沸點溶劑喺常溫下有較大蒸汽壓，揮發性強，容易被吸入。大部分有機溶劑有毒，部分會致癌。部分溶劑有好強穿透性，可以帶埋溶質一齊穿透皮膚進入人體。

根據溶劑嘅相關性質，用嗰陣應該分別注意避免明火，保持良好通風，避免吸入蒸氣，避免皮膚直接接觸等等。