漢陽

漢陽（粵拼：hon3 joeng4）係武漢三鎮之一，狹義上嘅漢陽係指家下嘅漢陽區，廣義上嘅漢陽係指長江以北、漢水以南嘅武漢市區，亦都係武漢市民習慣講嘅漢陽，包括漢陽區、沌口經濟技術開發區兩個區，有時重包埋蔡甸區（舊時嘅漢陽縣）。

「漢陽」呢個名根據中國地名嘅陰陽睇，應該係「漢水之北」，不過明朝成化年間漢水下游改道，結果漢陽呢個地方變成咗漢水之南，照計係要改口叫「漢陰」嘅，不過因為漢陽呢個名好早就有，啲人嗌開口改唔到，所以就一路叫漢陽。

史

西漢時呢度係沙羨縣轄地。
東漢末年魯山（今日嘅龜山）北面起卻月城，三國孫吳喺山嘅西南面起魯山城，漢陽地方形成城市，作為江夏郡治。
隋朝初年呢度設漢津縣。
隋大業二年（606年），因為個縣城喺漢水北面，按中國地名陰陽傳統「山南水北謂之陽，山北水南謂之陰」，定名爲漢陽縣。
唐武德四年（621年）鳳棲山南拓築漢陽城。
民國以來有將武漢三鎮合併嘅諗法，但三鎮分分合合，最終1949年合成爲武漢市，1950年8月26號縣府從漢陽市區顯正街搬出蔡甸，1952年漢陽市區改名做漢陽區，正式成為武漢市區。
1992年9月12號搬出嘅漢陽縣變成咗蔡甸區。

漢陽喺中國文化上係有名咖，鍾子期同俞伯牙嘅高山流水故仔就發生喺漢陽，「知音」呢個詞就出自呢個故仔，至今漢陽有「古琴臺」「琴斷口」嘅相關地名，琴臺一帶係武漢嘅交通樞紐。

近世漢陽以兵工廠出名，出產嘅武器號稱「漢陽造」。到今日漢陽依然係武漢嘅工業、經濟中心。

漢陽區屬武漢西南部，東面同武昌區隔住長江，之間連住武漢長江大橋、武漢長江三橋（白沙洲長江大橋）；北面同漢口隔住漢水。區內有山水，比如月湖、蓮花湖、龜山、鳳凰山。

漢陽區面積108.3km²，人口40萬8352人（2004年），轄12條街道。