開主選單

潘氏家廟粵拼pun1 si6 gaa1 miu6*2),堂號松福[1]cung4 fuk1),喺廣州河南龍慶北約(而家海珠區南華西路龍慶北2號、龍溪南首約17、19號),係清朝十三行同孚行行商潘正煒起嘅,建築坐北向南,係潘、盧、伍、葉四大行商家族之中現存規模最大嘅古建築[2]。2011年,成為海珠區第一批文物保護單位。2015年8月,升格做市級文物保護單位

潘氏家廟
松福堂
潘氏家庙.jpg
主祀 文巖資政公(十五世祖)
家族信息
家族 龍溪潘氏
源流 福建同安
修建史
始建 1826年
方位
地址 廣州市海珠區龍慶北2號、龍溪南首約17、19號
朝向 坐北向南
現時尚存
經已掛牌
登錄名 潘氏家廟
等級 廣州市文物保護單位
分類 古建築
8-16
登錄時間 2015年8月19號
潘氏家廟嘅木雕花

目錄

歷史

1776年到起潘氏家廟之前,能敬堂一直係潘家拜祭祖先嘅場所[3]

1826年同孚行行商潘正煒喺龍溪南首約起潘氏家廟同大院,潘氏家廟取代咗潘家祠,成為潘氏家族祭祀先人同舉行家族慶典嘅中心[3][4]

後嚟家道衰落,家廟嘅大院左側變賣出去,而家成咗三十三中嘅一部分,剩低家廟主體同其它殘餘部份,裡邊重有潘氏後人居住[1]

建築

潘氏家廟佔地約莫3000平方米,係一座坐北朝南、磚瓦木石結構嘅古建築,裡邊嘅大院原本闊30米、深80米。佢嘅廳房間隔組合複雜。喺龍慶北嘅門牆正面係青磚石腳,門口由腳門、趟櫳同紅木大門組成。喺正門後邊、二廳前邊曾經掛住塊匾,寫住「潘松福堂」四隻大字[1]

成座家廟三開五進,中軸有好多間廳堂,由前到後依次係頭廳、二廳、祠廳、老太太廳、神廳,廳同廳之間都用天井間開。廳堂两側嘅廂房基本對稱,用嚟做書房、寢室或樓梯間。家廟嘅建築用料同裝飾陳設都好講究,採用中式結構、西式吊頂,粗cyun4巨柱,雕花門楣,牆上窗ling4有一式嵌住刻花玻璃嘅滿洲窗,廳堂裡邊擺嘅係名家手筆同酸枝紅木家私[1]

近嚟

2007年4月,第三次全國文物普查工作開展,潘氏家廟被登記做「不可移動文物」[5]

2011年6月13號,潘氏家廟同土華村嘅梁氏大宗祠、大塘村嘅李雍别墅、崙頭村嘅黎氏宗祠、崙頭社稷之神祭壇、沙溪村嘅三聖宮、康帥府一齊列為海珠區第一批文物保護單位[5]

2011年12月1號,門口掛「廣州市海珠區文物保護單位」牌。

2014年12月23號,海珠區副區長方錦群、區政協副主席黃信儀同區政協代表嚟潘家大院調查保護利用工作,視察咗潘氏家廟同周邊環境,重喺街坊會所召開工作座談會,收睇潘家大院保護規劃影片[6]

2015年8月,被列入第八批廣州市文物保護單位名單[7]

  1. 1.0 1.1 1.2 1.3 "南華西歷史文化之潘家大院". 海珠區政府網. 海珠區南華西街道. 2013年4月18號. 喺2015年8月7號搵到. 
  2. "穗坐擁4533處文物「家底」". 南方日報. 搜狐滾動. 2012年1月12號. 喺2015年8月7號搵到. 
  3. 3.0 3.1 鍾暉 等, 編 (2014). 海珠古祠堂. 廣州: 廣東教育出版社. 第 29頁. ISBN 978-7-5548-0235-9. 
  4. "龍溪首約:看盡行商興廢事". 南方日報. 南方網. 2014年10月14號. 喺2015年8月7號搵到. 
  5. 5.0 5.1 "潘家大院終入「保護圈」". 羊城晚報. 金羊網. 2011年7月14號. (原先內容喺2011年7月28號歸檔). 喺2015年8月7號搵到. 
  6. "海珠區政協調研潘家大院保護利用工作 南華西街創建全國安全社區信息簡報(第一期)". 海珠區政府網. 海珠區南華西街道. 2014年4月30號. 喺2015年8月7號搵到. 
  7. "廣州市人民政府關於公佈第八批廣州市文物保護單位名單的通知". 市政府辦公廳. 中國廣州政府門戶網站. 2015年8月19號. 喺2015年10月1號搵到.