瀋陽故宮
瀋陽故宮（粵拼：sam2 joeng4 gu3 gung1），係位於中國遼寧瀋陽瀋河區瀋陽路171號嘅宮殿，喺清兵未入關時，佢係後金嘅正宮，稱爲盛京皇宮（sing6 ging1 wong4 gung1），清朝遷都北京之後，變成行宮，稱爲盛京行宮（sing6 ging1 hang4 gung1）、奉天行宮（fung6 tin1 hang4 gung1），係北京紫禁城嘅附屬宮殿[1]。1926年由行宮改爲東三省博物館[2]，而家佢變成瀋陽故宮博物院。
| 北京及瀋陽嘅明清皇家宮殿 | |
|---|---|
 聯合國教科文組織認定嘅世界遺產 | |
 瀋陽故宮內嘅崇政殿 | |
| 登錄原文名 | |
| 英文 | Imperial Palaces of the Ming and Qing Dynasties in Beijing and Shenyang |
| 法文 | Palais impériaux des dynasties Ming et Qing à Beijing et à Shenyang |
| 基礎信息 | |
| 國 |  中華人民共和國 |
| 位 | 遼寧省瀋陽市 |
| 座標 | 41°47′46.9″N 123°26′56.2″E / 41.796361°N 123.448944°E |
| 類 | 文化遺產 |
| 標準 | i、ii、iii、iv |
| 籌 | 439 |
| 登錄史 | |
| 登錄年份 | 1987年 （第11屆） |
| 擴充年份 | 2004年 |
| 中國全國重點文保單位 瀋陽故宮
| |
|---|---|
 | |
| 所在 | |
| 類 | 古建築及歷史紀念建築物 |
| 時代 | 清代 |
| 號 | 1-112 |
| 登錄 | 1961年 |
概況
編輯瀋陽故宮係中國而家僅存最完整嘅兩大古宮殿之一[2]，另一個係北京故宮，都係清代時中國皇帝嘅皇宮。瀋陽故宮喺1625年到1636年間修築，康熙、乾隆時改建擴建過[2]，有114座建築、500間房[3]，包埋一間好珍貴嘅藏書館，佔地六萬平方米[2]，係北京故宮嘅十二分之一[4][5]。
喺清兵入關之前佢係後金兩位皇帝努爾哈赤、皇太極嘅皇宮，入關之後就作爲陪都行宮。因爲佢係龍興重地嘅宮殿，所以好受歷代清帝重視。1671年到1829年呢150年間，康熙、乾隆、嘉慶、道光四朝皇帝共10次東巡，爲咗畀東巡祭祖時啲皇帝后妃住，乾隆喺原先舊宮之外起多行宮，又加咗西路建築，從北京運啲珍寶來表示毋忘根本，當時瀋陽故宮同北京宮苑、熱河行宮並列爲清代三大皇家文物寶庫[2]。瀋陽故宮係清朝建立嘅見證，亦係清史、滿族同其他北中國部族嘅文化傳統嘅歷史見證[1]。1961年，佢畀中華人民共和國國務院確定爲第一批全國重點文物保護單位，2004年7月畀聯合國教科文組織認定爲世界遺產，作爲擴展項目，同北京故宮並列爲「北京及瀋陽嘅明清皇家宮殿」（簡稱明清故宮）呢項文化遺產[3]。而家作爲博物院來開放畀公眾。
建築
編輯瀋陽故宮喺建築風格上融合咗中國傳統宮殿同埋滿族、東北地方特色，兼收漢族、蒙古族、藏族嘅建築結構同裝飾法[2]。所有嘅建築分成東、中、西三路，分別係努爾哈赤、皇太極、乾隆三朝皇帝起嘅[4]。東路以大政殿爲中心、十王亭爲兩翼；中路係皇宮主體架構，有大清門、崇政殿、鳳凰樓、臺上五宮；西路對稱返東路，條對稱軸係大清門─清寧宮，其中西路有中國史上最大叢書《四庫全書》嘅收藏處文溯閣[4]。
攷
編輯- ↑ 1.0 1.1 "Imperial Palaces of the Ming and Qing Dynasties in Beijing and Shenyang". 聯合國教科文組織世界遺產中心. 喺2014年11月8號搵到.
- ↑ 2.0 2.1 2.2 2.3 2.4 2.5 〈歷史沿革〉。瀋陽故宮博物院。原著喺2016年3月5號歸檔。喺2014年11月8號搵到。
- ↑ 3.0 3.1 〈走進博物院〉。瀋陽故宮博物院。原著喺2015年5月12號歸檔。喺2014年11月8號搵到。
- ↑ 4.0 4.1 4.2 〈瀋陽故宮〉。遼寧旅遊資訊網。喺2014年11月15號搵到。
- ↑ 〈揭曉瀋陽故宮三大饒有趣味的看點〉。《中外旅遊雜誌網》。新浪旅遊。2014年3月27號。喺2014年11月15號搵到。
連出去
編輯
- 瀋陽故宮博物院（官方網站）