火車轆

火車轆fo2 ce1 luk1顧名思義係指設計嚟畀火車用嘅轆。喺現實應用上，火車轆實係一對對噉嘅，同一對轆入面嘅兩個轆會一齊同步噉旋轉。而一般嚟講，每截車廂會有 8 至 12 個（4 至 6 對）轆。

呢幅抽象圖解描繪兩個火車轆，兩個轆攞條直嘅軸結合埋一齊，成一對轆。

火車轆嘅形狀：呢幅抽象圖解描繪火車（藍色線）同電車（綠色線），轆嘅形狀（實線）同路軌嘅形狀（虛線）。左表示「向外嗰邊」。

形狀

睇埋：出軌

火車轆喺形狀上有特別嘅設計（可以睇附圖嘅圖解），一個轆喺入面嘅圓周明顯大啲，而喺出面嘅圓周就明顯細啲，呢種設計幫到手確保架車冇咁易出軌。事實係，啲工程師或者第啲工作人員檢查一架火車嗰陣，梗會睇吓啲轆嘅形狀係咪正常－如果有轆因為摩擦力摩損而形狀變咗，就有機會搞到架火車出軌，出軌可以造成嚴重嘅人命財產傷亡。

2011 年影到兩個火車轆；由幅圖睇得到，啲轆向入嗰邊嘅圓周，明顯比較大。 2011 年影到兩個火車轆；由幅圖睇得到，啲轆向入嗰邊嘅圓周，明顯比較大。

溫度

睇埋：廢熱

啲人設計同檢查火車轆嗰時，成日會留意溫度相關嘅問題：事實表明，一架火車行嗰陣時，佢啲轆會承受極大嘅力－除咗架火車嘅重量之外，仲有係啲轆同路軌之間嘅摩擦力，呢啲力實會產生咁上下量嘅熱；而且有工程學研究報告指，當一架火車耷逼力bik6 lik1嗰時，佢啲轆可能要承受成攝氏 550° 至 600° 咁熱嘅溫度。因為噉，火車轆相關嘅分析成日都會考慮溫度相關嘅問題，包括

• 確保啲火車轆用耐熱能力高嘅材料造，當中鋼好受歡迎；
• 同火車轆做測試嗰陣，要向啲轆施以高溫，睇吓啲轆頂唔頂得順，啲轆起碼要頂得順高溫，先可以算係通過安全測試；
• 火車軌上面會裝感應器，睇吓啲行經嘅火車嘅轆有幾熱，如果感應器探測到「有啲轆似乎異常咁熱」，工作人員就會想搵機會停低同架火車做檢查；

... 呀噉。

睇埋

• 輪軸
• 路軌