有軌電車粵拼jau5 gwai2 din6 ce1英文tram 或 streetcar,香港簡稱電車,北美叫街車)係一種行軌道交通工具,輕過火車。通常係市區裏面行,或者連住唔同嘅村落,市鎮。電車同火車唔同嘅地方係佢通常起響街上面,有時會預一啲綫畀佢專用。唔少電車綫都冇站台,有時行過街就係。用噉嘅設計,條街路就可以同時容得落電車、行人、同其他車一齊用。

香港雙層電車

有軌電車主要有兩種嘅供電方式,一種係車頂電纜通過接觸集電弓/集電桿供電,另一種係第三軌供電。早期嘅電車有試過用動物或者內燃機車做動力,但係今日已經好少見。

歷史 編輯

 
奧地利維也納嘅有軌電車系統係現存規模最大、重運作緊嘅有軌電車系統。
 
1908年3月5號上海第一部有軌電車到達外灘廣東路終點站嘅場景
 
天津濱海新區嘅Translohr膠輪導向電車

第一條用於客運嘅路面有軌車,係1807年喺英國啟用嘅公共馬車(Omnibus)。1828年,美國馬里蘭州巴爾的摩修建咗第一條有軌馬車綫路,之後紐約新奧爾良分別喺1832年同1834年開通咗類似嘅綫路。1873年,三藩市起咗條有軌車綫路,不過係用鋼纜拉住部車行,所以嚴格來講唔算係電車。同一時期,喺一啲城市道,出現咗用小型窄軌蒸汽機車牽引嘅市內有軌交通。

1879年,德國工程師西門子(Ernst W. von Siemens)喺柏林工業展上面首先嘗試用電力帶動軌道車輛。之後俄國聖彼得堡加拿大多倫多都試過開通有軌電車嘅商業運營。匈牙利布達佩斯喺1887年建立咗第一個有軌電車系統。1888年,美國維珍尼亞州列治文亦都開通咗有軌電車。

中國最早嘅有軌電車,係1899年由德國西門子公司喺北京修建嘅、連接馬家堡火車站永定門嘅有軌電車。1904年,香港開通有軌電車,此後設有租界或成爲通商口岸嘅各個中國城市都相繼開通有軌電車。天津同上海嘅有軌電車先後喺1906年同1908年開通。之後,日本同俄國相繼喺大連、哈爾濱、長春、瀋陽等城市開通有軌電車綫路。北京嘅市內有軌電車喺1924年開通。1956-1958年,鞍山開通有軌電車。

有軌電車喺20世紀初風行一時。但自從1950年代起,私家車、巴士同其他路面交通逐漸普及,加上汽車生產商嘅推波助瀾[1],唔少有軌電車系統陸續停運、拆卸。有軌電車網絡喺北美、英國、西班牙等地幾乎完全消失,但係喺瑞士、德國、波蘭、奧地利、意大利、比利時、荷蘭、日本、千里達、泰國等國,有軌電車網絡重保養良好。

近年來,大眾開始知道私家車太多會引起空氣污染、汽油依賴、泊車難等種種問題。唔少政府因此改變原先過度依賴汽車嘅交通規劃。巴士由於同其他車共用路面,提唔到好高速度。而地鐵成本高,用喺市郊無實際。於是有軌電車嘅優點越來越明顯。從1970年代末起,部份無有軌電車嘅地方喺政府做過硏究之後,開始建造新嘅有軌電車線。好多重有有軌電車嘅城市亦增加線路,或者將原有系統現代化。

低地臺有軌電車喺1990年代出現。乘客上落低地臺有軌電車嘅時候唔使上落梯級,大大方便殘障人士搭車。

2001年,鞍山有軌電車停運。到此,中國重有舊時有軌電車嘅城市剩返大連長春。2006年,天津濱海新區引入法國産嘅膠輪導向電車Translohr,用來運營天津開發區導軌電車一號線。部份媒體將伊種膠輪導向電車稱為有軌電車,但係膠輪導向電車嘅膠輪同軌道淨係起導向嘅作用,並無行駛同承重嘅功能,同真正意義上嘅有軌電車有本質嘅區別。2007年尾,大連駁通現有嘅兩條電車綫路。2009年,上海浦東新區亦都引入膠輪導軌電車。2012年3月,瀋陽有軌電車系統開工,8月投入運營,瀋陽消失咗近四十年嘅有軌電車,又返到市民嘅生活入邊。同一年,蘇州高新區開始興建蘇州高新區有軌電車,遞時會同蘇州現有嘅軌道交通接駁。另外,北京最近引入一種以第三軌供電,但保留咗集電桿嘅仿古式電車,從而喺形式上恢復咗部分「有軌電車」路綫作爲一種文化象徵來紀念。

2014年12月,廣州嘅海珠環島有軌電車試營運。

雙層有軌電車 編輯

目前全球只有三座城市嘅有軌電車系統重有雙層電車。依三座城市分別係香港、英國黑池埃及亞歷山大港。其中香港電車更加係全球唯一全部採用雙層電車嘅系統。

有軌電車嘅優點 編輯

 
大連嘅舊式有軌電車
  • 一公里有軌電車線所需嘅投資通常只係一公里地下鐵路嘅三分之一,因此對於中型城市或者人口唔密集嘅地區來講,有軌電車係實用而廉價嘅選擇;
  • 唔使挖掘地底隧道,車站唔需要高價環控設備,乘客上落車唔使行好遠;
  • 有軌電車一般同汽車共用路權,唔使起架空路軌,慳街道空間;
  • 因為有軌道引導,所以駕駛操作容易過無軌電車;
  • 有軌電車以電力推動,車輛唔會排放廢氣。

有軌電車嘅缺點 編輯

  • 因為要設軌道同電網,建設成本高過無軌電車,對小型城市來講財政負擔幾重下;
  • 受軌道同電網限制,行駛冇無軌電車咁靈活,
  • 路軌佔用路面,其他路面交通通常要讓條行車線出來畀有軌電車;
  • 速度同載客量都比唔上地鐵;
  • 一部車發生意外可能會造成全線癱瘓。

參考 編輯

  1. Jim Klein. Taken for a Ride (英文). PBS.

睇埋 編輯