熊貓燒香

熊貓燒香（粵拼：hung4 maau1 siu1 hoeng1；病毒編碼：Win32.Worm.WhBoy.*），又嗌武漢男生，係隻Windows嘅蠕蟲病毒，呢隻病毒喺2007年1月7號開始發起大規模攻擊，喺中國大陸啲電腦受影響。

個病毒要通過網上下載嚟傳染。用戶一旦中咗噉嘅病毒，最先一大堆*.exe文件都打唔開，之後一大堆文件都會清一色變成熊貓舉起三支香嘅圖，但唔感染Windows系統資料夾入面啲嘢。不過凡係遇到殺毒軟件同防火牆，病毒都識強制結束進程，甚至出現藍屏、成日重啟嘅情況。尤其喺Windows 2000同XP系統，一旦遇到廢密碼或空密碼情況，病毒都會趁火打劫。個病毒重識喺運行之後，喺各個盤放出autoun.inf同佢本身個病毒，造成磁盤分區同U盤、A盤等可移動磁盤裝置都冇辦法正常打開。

後嚟個病毒俾湖北省公共信息網絡安全監察小組發現兼報案，查到個病毒原嚟係湖北武漢新洲區嘅編程家——李俊同埋佢班同夥一手所為。湖北省公安廳卒之喺2007年2月1號將李俊同佢班同夥一齊叉住兼收監四年。李俊同佢班同夥喺2010年12月底出獄。