牙周病
維基百科嘅醫學類文章只係提供參考，並唔係醫療意見。 閣下如果有任何關於健康嘅問題，請諮詢專業醫護人員。 |
牙周病（英文：periodontal disease）係一種影響牙周組織嘅疾病，由黏附喺牙齒表面嘅牙菌膜導致牙肉發炎。如果口腔衛生欠佳，牙菌膜就會長期積聚喺牙齦邊緣。牙菌膜裏面嘅細菌就會分泌毒素，刺激牙齒周圍嘅組織，例如牙齦、牙周膜、牙槽骨等，引致牙周病。
| 牙周病 | |
|---|---|
| 分類同外部資源 | |
 | |
| ICD-10 | K05.4 |
| 疾病DB | 29362 |
| MedlinePlus | 001059 |
如果牙菌膜積聚，牙齦邊緣會出現發炎徵狀，造成輕微牙周病（即係牙齦炎）。若果身體抵抗力下降，身體組織癒合能力欠佳，牙周組織包括牙齦、牙周膜、牙槽骨等就會遭受破壞，情況就會惡化，形成嚴重牙周病（即係牙周炎）。
牙齦炎
編輯牙齦炎屬於輕微牙周病，如果牙齒冇徹底清潔，牙齦邊緣同牙罅就長期積聚牙菌膜。牙菌膜面嘅細菌就會分泌毒素刺激牙齦，引致牙齦發炎。牙菌膜亦會俾口水鈣化，形成牙石。由於牙石的表面好粗糙，因此導致更多牙菌膜積聚，令到牙齦持續發炎，甚至有機會惡化變成嚴重嘅牙周病。
牙周炎
編輯牙周炎屬於嚴重牙周病，如果仍然冇做好口腔護理，發炎嘅情況會持續，導致原本緊附喺牙根表面嘅牙齦同牙根分離，形成一個空間，稱為「牙周袋」。呢個空間更加容易令到食物殘渣、牙菌膜、牙石堆積，令到牙周組織持續受到破壞，引致牙周炎。牙齦邊緣可能有膿液滲出，甚至會出牙瘡，牙齦同牙槽骨亦會慢慢萎縮，導致部分牙根外露，增加患牙根蛀壞嘅機會。如果牙周炎繼續惡化，牙周組織包括牙齦同牙槽骨會受到嚴重破壞，導致牙槽骨萎縮，牙齒因而失去支撐，變得鬆動同出現移位，最後甚至會甩牙。
牙周病後果
編輯- 患牙周病嘅人除咗牙齦紅腫、有口臭之外，嚴重嘅重會有牙齦萎縮、牙縫增闊、牙齒鬆動移位，甚至成隻牙齒鬆脫等現象。
- 由於牙齦萎縮之後可能會導致牙齒敏感，患者進食冷熱甜酸食物嘅時候就會覺得牙痛。牙周病達到嚴重程度嘅時候，牙齒更加會鬆動、移位、甚至甩牙，令到𡁻嘢食嗰陣有啲辛苦，生活質素同身體健康都受到影響。
- 鑲有假牙嘅牙周病患者，由於佢嘅牙周組織萎縮之後假牙托會變得唔啱戴，患者就要重新鑲配一副合適嘅假牙。
治療方法
編輯- 以洗牙嘅方法清除牙石；
- 牙根刮治：利用牙科儀器清刮牙根，清除牙周袋裏面同牙根表面嘅牙菌膜同牙石，幫助牙周組織同牙根癒合，而消除牙周袋。
- 牙周手術：透過手術打開牙齦，方便用牙科儀器清刮牙根表面。呢種手術適用於治療較深而儀器難以到達深處嘅牙周袋。
預防方法
編輯- 每日早晚刷牙，清潔牙齒，尤其是清潔牙齦邊緣嘅位置。
- 單靠刷牙係唔能夠有效噉清潔牙罅嘅，因此亦需要每日使用牙線或牙縫刷等清潔牙齒。
- 鑲有固定假牙（牙橋）嘅人士都應該要徹底清潔牙齒，並要用特效牙線清潔牙橋底部嘅位置。
- 配戴活動矯齒器嘅人士需要每日朝早起床同夜晚瞓覺之前將活動矯齒器除落嚟清洗。唔戴活動矯齒器嗰陣，應該將佢浸喺清水度。