牙籤弩

牙籤弩係一種射擊玩具，2017年開始喺中國大陸流行，體積只有手掌咁大，形狀同運作原理同弩差唔多，唔同嘅地方係弩發射嘅係牙籤。經過傳媒實測，發現只要喺弩度插上牙籤、鋼針，發射之後可以射穿汽水罐，甚至石膏，威脅到其他人嘅安全，經過傳媒報導之後，淘寶網即時全線下架。

產品特徵

牙籤弩嘅尺寸係10cm×13cm，有兩種材料，一種係塑膠，一種係全金屬，原理同一般嘅弩差唔多，靠彈力射出棉花棒、牙籤或鋼針等。網上有人用測速儀測量金屬做嘅牙籤弩，發現牙籤弩射出嘅牙籤時速高達256公里，有效射程超過五米，連玻璃都射得穿，更可以輕易插入木板、石膏板同硬膠凳背。另外有人用每秒960幀嘅高速攝像機，測出牙籤弩所發射衣車鋼針速度，高達每小時144公里；若果用一塊豬肉來模擬人體，發現鋼針可以插入豬肉四厘米。

管制

香港

香港警方已經界定牙籤弩屬於攻擊性武器，市民一旦喺公眾地方管有牙籤弩，會觸犯《公安條例》第33條嘅「喺公眾地方管有攻擊性武器」，一經定罪，最高刑罰監禁3年。另外，如果市民管有牙籤弩並意圖用作非法用途，會觸犯《簡易程序治罪條例》第17條「管有攻擊性武器，並有所意圖」，最高可以判罰款$5000及監禁2年。

澳門

澳門司警已經將牙籤弩列為武器，如果傷害到其他人，可能會觸犯澳門《刑法典》第262條「禁用武器及爆炸性物質」罪。