理論物理學

理論物理學lei5 leon6 mat6 lei5 hok6（英文：theoretical physics）係物理學嘅一個分支。佢用數學模型，抽象嘅物理物體同系統，去解釋同預測自然現象。呢個同實驗物理學好唔同，因為實驗物理學係用實驗工具去探測呢啲現象嘅。

科學嘅發展通常取決於實驗研究同理論之間嘅相互作用。喺某啲情況下，理論物理學會遵從嚴格嘅數學標準，但唔會太重視實驗同觀察嘅結果。譬如話，喺發展狹義相對論嘅時候，愛因斯坦關注嘅係勞侖茲變換可以令麥士維方程組唔變，但對於驗證地球係咪穿過以太嘅邁克生-莫雷實驗就好似冇乜興趣。另一方面，愛因斯坦因為解釋光電效應而攞到諾貝爾物理學獎，而呢個效應之前只係實驗上嘅結果，無辦法用理論去解釋。

簡介

睇埋：物理學同數學模型

物理學理論係形容物理事件嘅模型，話一個理論好定唔好，係取決於佢嘅預測同實驗結果嘅吻合度。評估一個理論嘅質素，亦都會考慮佢嘅新預測可唔可以透過新嘅實驗得到驗證。物理學理論同數學定理嘅區別喺，數學適用性嘅評估唔係根據任何實驗結果去決定。所以，物理學理論同數學理論入面，「理論」呢個字喺數學同物理學入面有唔同嘅意思。