狗疾病一覽

狼同狗可以受多種疾病侵襲。

一隻患有嚴重犬瘟熱嘅狼；佢喺度係噉抽搐。

病毒性疾病

狼可以帶多種嘅病毒性疾病（viral disease；由病毒引起嘅病），常見嘅有：

• 癲狗病（rabies）：喺俄羅斯、伊拉克、伊朗、阿富汗、同印度等地，狼係癲狗病嘅一個主要帶病動物；一隻惹咗癲狗病嘅狼有 8 至 21 日嘅潛伏期，而發病會令一隻狼情緒變唔穩定、離開所屬嘅狼群、同每日行成 80 公里（50 哩），提升佢惹到其他狼嘅機會率。惹咗癲狗病嘅狼唔驚人，甚至仲會主動攻擊人類，可以搞到惹癲狗病俾人類。
• 犬瘟熱（canine distemper）係一種會攻擊神經系統嘅病，對狗嚟講可以致命，但狼好少可會死於犬瘟熱。
• 犬細小病毒（canine parvovirus）會引致脫水、電解質不平衡、同敗血病等，對幼狼嚟講可以致命，但成年嘅狼通常都唔會死於呢種病毒。

細菌性疾病

狼亦都可以帶有多種嘅細菌性疾病（bacterial disease；由細菌引起嘅病），常見嘅有：

• 豬布魯氏菌（Brucella suis）係一種主要感染豬嘅細菌，但有唔少豬以外嘅動物都可以惹呢隻菌上身；馴鹿可以惹到豬布魯氏菌，而狼可以由馴鹿身上惹到豬布魯氏菌；成年嘅狼唔會點受呢種菌影響，但狼乸惹到呢隻菌會搞到佢生嘅幼狼惹到，而豬布魯氏菌可以嚴重噉削弱幼狼。
• 萊姆病（lyme disease）可以完全噉削弱成年嘅狼，但研究顯示萊姆病好少可會對狼嘅數目有明顯影響。
• 鈎端螺旋體病（leptospirosis）可以由受感染嘅獵物或者尿嗰度惹到，會引致發燒、無胃口、嘔吐、貧血、血尿、黃疸、同死亡；喺農場附近住嘅狼零舍容易惹到呢隻病，而噉似乎係因為呢啲狼比較易接觸到牲畜嘅大小便。

寄生蟲

一隻因為疥蟎而患上疥瘡嘅野生狼

狼身體表面同體內都可以有寄生蟲，喺前蘇聯地區嘅狼據講帶有至少 50 種唔同嘅寄生蟲。雖然呢啲寄生蟲多數都唔會對正常嘅狼造成明顯傷害，但如果惹到寄生蟲嘅係本身經已有病或者營養不良嘅個體，寄生蟲就會對隻狼有危險性；而且狼仲有機會會將寄生蟲傳俾第啲動物－狼帶嘅寄生蟲可以傳俾狗，狗跟住有機會將呢啲寄蟲傳俾人，而喺狼會獵食牲畜嘅地區，佢哋仲有機會可以傳啲寄生蟲俾牲畜。

體外

有多種節肢動物都會寄生喺狼身體表面，包括跳蝨、蝨乸、同蟎呀噉。當中疥蟎（mange mite；學名：Sarcoptes scabiei）對狼造成嘅危害最大，尤其係對幼狼，不過狼（唔似得狐狸）好少會發展出毛囊蟲病（mange）；蝨乸可能會搞到狼唔舒服，但好少可會引致死亡；而蜱（tick）就係對狼危害比較大嘅寄生蟲之一，可以搞到一隻狼惹到萊姆病同落磯山斑點熱（Rocky Mountain spotted fever）－後者係可以致命嘅。

體內

常見寄生喺狼體內嘅生物包括：

• 原生動物（protozoan）：會寄生喺狼體內嘅原生動物品種數量十隻手指數得嗮。
• 犬新包蟲（Neospora caninum）：會寄生喺狼體內，而呢點令好多農民擔心－呢種寄生蟲可能會透過狼傳俾牲畜，而帶有呢種寄生蟲嘅牲畜流產嘅機會會提升 3 至 13 倍。
• 有多個品種嘅吸蟲綱（alaria）都會惹到狼。呢啲吸蟲通常係興寄生喺嚙齒目、兩棲類、同魚類等細隻嘅脊椎動物身上，而狼將呢啲動物食落肚嗰陣，會惹到呢啲寄生蟲；呢啲寄生蟲多數會住喺狼嘅腸胃或者肝嗰度，由對隻狼冇乜影響以至搞到隻狼個肝有事或者消瘦嘅都有。
• 絛蟲綱（tapeworm；Eucestoda）喺狼當中好常見，因為呢啲寄生蟲興寄生喺有蹄類、細隻哺乳類、同魚類身上－呢啲動物冚唪唥都係狼成日會食嘅。絛蟲一般都唔會對狼做成乜嘢大傷害，不過呢點視乎啲絛蟲嘅大細同數量以及隻狼本身嘅體質而有異。狼有絛蟲嗰時通常會便秘、有過敏反應、同營養不良。有絛蟲嘅狼好多時屙嘅大便裏面會有絛蟲嘅蛋，而呢啲絛蟲蛋跟手就會流落去地下嘅草嗰度，然後俾啲有蹄類食返落肚，形成一個循環。