狼兵

狼兵 ，係由明朝中葉出現嘅一種軍事單位，係由廣西 、 廣東一帶招募嘅人組成嘅軍隊，屬於明朝廷嘅精銳部隊。 啲兵主要都係壯族 、 瑤族嘅人，係受土官嘅節制。 而狼兵並唔會有在冊嘅兵籍，係以僱傭軍嘅形式存在。由於隻部隊好狼好打得，明朝好多次派狼兵去清剿啲地方武裝，仲有對抗倭寇嘅戰爭。 部隊由於缺乏啲軍紀，啲民眾係有怨言亦好畏懼佢哋。

史

留存嘅有狼兵出現嘅最早記載，係喺明英宗正統二年，由廣西向朝廷奏提交嘅奏摺度，係第一次提到咗狼兵係愛嚟剿匪。 跟著之後明朝就多次調用狼兵打仗 。 狼兵並唔屬於正式軍隊嘅編制 ，係一個由土官主理嘅特殊兵種，唔受一般官差嘅控制 ，同朝廷編制嘅官兵、各地方編練嘅土兵唔一樣。

狼兵主要係出自廣西，但廣東度都有自己嘅狼兵 。

待遇同活動

狼兵係冇得攞軍餉，實行「有戰則兵，無戰則農」嘅「兵譜甲跟」制。土司係按兵丁員額去配發啲地，用土地去養兵。而每年嘅秋後，土司都要舉行返次會獵，即係全州嘅比武訓練會，包括有鬥拳腳、刀槍劍戟、舉重、騎馬射箭、排兵佈陣等。優勝者除咗會得到榮譽稱號，仲會有得拎白銀或武器、農具、布匹等實物獎勵。土司本身都冇朝廷嘅俸祿，全靠自己嘅封地出產去支持返啲使用。而朝廷就用「號紙」（委任狀）去到控制啲土司。每有戰事，就會用權杖傳檄徵調啲土司狼兵。

喺廣東度嘅活動

明朝嘅廣東沿海省成日有倭寇侵擾，明初制定咗衛所制，喺廣東各地建立啲衛所駐防，但兵力分散唔夠啲倭寇打，中央就又派遣啲狼兵去打啲倭寇。而喺廣東嘅其他戰事入邊，狼兵都係支主要嘅鎮壓軍，比如鎮壓瑤族嘅起義、鎮壓鄉民嘅起義等。鎮壓黃蕭養起義嘅時候，官府就有調廣西狼兵去咗策應，喺1450年4月嘅戰事尾聲中，黃蕭養嘅部隊就同啲狼兵激戰過成五個晝夜。

朝廷喺用大班狼兵鎮壓咗羅旁河（廣東鬱南）嘅瑤人之後，就喺廣東西部、粵西北各地派駐唔少狼兵，防範啲瑤民。

獨立嘅在冊建置

明代嘅時候，大藤峽地區瑤人反抗嘅勢頭好高，朝廷就喺呢度設立咗東部土官統治區中，級別最高嘅武靖州，作為東進狼兵最重要嘅集結地。到嘉靖、萬曆年間，隨著鎮壓瑤人嘅戰事進入咗尾聲，武靖州就改成武靖鎮，大藤峽呢度嘅狼兵或裁撤咗唔少。由地方誌留低嘅記載睇，後期就轉變成狼兵同狼民兩種嘅身份方向。其中三分一保留低嘅狼兵，就有單獨嘅狼丁冊做身份識別，不過就轉由縣府嘅官差去到管制呢啲士兵，狼兵係俾分歸咗桂平、平南、貴縣三縣自管，直接歸屬流官。在冊嘅狼戶需要俾官府啲差役同米糧，但主要嘅職能仲係應兵役，繼續承擔著守城等軍事職責。到滿清朝後，狼兵係冇好重要嘅作戰主力角色，但到雍正時仲起用過狼民協防。而乾隆年間地方度有官府仲會出公告，認可啲狼民係備兵役而免除差役。