黃蕭養

黃蕭養 （ 粵拼：wong4 siu1 joeng5，？—1450年），原名黃懋松 ， 廣州府南海縣衝鶴堡潘村人（而家嘅順德勒流鎮）， 明朝 正統年間廣東嘅民眾起義主要領袖，後尾俾官兵鎮壓而戰死。 明廷喺鎮壓咗黃後為咗強化管治，而改組咗南海縣同新會縣嘅部分地域，創建咗順德縣 。

出身背景

黃蕭養嘅出身係佃農 ，成年嘅時候喺一次田地糾紛入邊唔覺意傷咗人，就俾官差拉咗，後遇正咗大赦而放返出嚟，但黃嘅生計無以為繼，於是就去咗做海盜。跟著再俾官府以盜賊嘅罪名收監，準備要問斬佢。 黃第二次入監嘅時候，識到一位囚友係江西嘅生意佬，兩人熟絡咗後就謀劃一齊越獄，仲秘密咁喺飯桶收埋咗利斧。

起義事蹟

明英宗正統十四年（1449年）三月八號，黃等人就同其他嘅囚犯，一齊由廣州監倉度出逃，同時間攻破咗軍器局而攞到大量嘅裝備在手，隨即就起事，後敵唔過啲官兵而搭船出海，官兵就出咗三條戰船跟著追擊。 到五月十三號黃等喺赤崗海口，成功伏擊咗追擊嘅官軍。

隨著起事嘅壯大啲民眾跟著響應埋，黃蕭養由六月開始帶著啲人去攻打各縣城。 到咗九月係集結咗成五百條船、幾萬嘅人馬，就跟著圍攻廣東省城廣州 ，擊殺埋鎮守嘅安鄉伯張安 。喺佔據咗五羊驛做行殿之後，就自稱順民天王 （或順天王 、 東陽王 ），年號東陽 ，仲授咗一百幾人官職 。 到第二年，朝廷就派咗右僉都御史楊信民 、都督同知董興帶軍去鎮壓，調集埋兩廣同江西嘅官軍一齊去打黃嘅部隊。喺圍城八個月後，10月嘅時候黃喺白鵝潭嘅戰鬥度中箭身亡。

黃嘅部將

• 彭文俊
• 梁升
• 李觀奴
• 張嘉積

後續

黃蕭養被官軍殺咗之後，起義軍亦有過萬人遭到咗屠殺。 不過剩低嘅起義軍，仲好頑強咁對抗官軍，一路堅持到成化年間。

參考

• 《明史》