玉溪衞公祠

玉溪衞公祠 思賢堂
主祀	玉溪（十二世祖）
家族信息
家族	瀝滘衞氏
起源	河東郡
修建史
始建	明朝
重修	1668年 1687年
方位
地址	廣州市海珠區瀝滘村水基坊
朝向	坐北朝南
家時無咗
損毀年代	2009年4月21號

玉溪衞公祠，堂號思賢，喺廣州市海珠區瀝滘村水基坊，係番禺瀝滘衞氏大夫房十二世祖、將仕郎衞玉溪嘅祠堂。明朝起。坐北朝南。2008年10月尾列入海珠區文物保護控制範圍。2009年4月21號，珠江地產拆咗呢座祠堂去。殘料而家躉喺大宗祠。

建築

三間兩沓兩廊。有頭門、天井、兩廊、正堂。總面闊15.65米，總進深16.8米。佔地面積262.9平方米。磚、木、石結構。

第一沓係頭門，明朝起。面闊三間，進深兩間7.3米夾埋九架。硬山頂，初頭係鑊耳封火山牆，後尾改成人字山牆，牆體係青磚紅砂岩石腳。屋面有升起同舉折，碌灰筒素瓦，卷草素瓦當滴水剪邊。墀頭疊澀出簷。簷口有如意圖案封簷板。前簷柱同間隔牆承重，有分中牆。前廊4碌紅砂岩八角柱，柱頂刻柱頭斗，「鹹水石」束腰八角柱礎。柱間上高放木額枋，枋下低有卷草雀替，枋上各架兩駝峰斗栱承桁。分中牆明間正中開門，紅砂岩門夾，下有石高門檻，有雙掩門。內明間係門廳，兩次間係倒朝房，後牆分別開門通去兩廊。第一二沓之間係天井，深7.45米。紅砂岩條石橫鋪地面。天井兩廊三開間，卷棚頂。紅砂岩八角柱同側牆承重。

第二沓係正堂，清初起。面闊12.7米，進深11.7米共十三架。硬山頂，鑊耳封火山牆。碌灰筒素瓦，瓦當滴水剪邊。兩柱同前後磚牆承樑架，穿斗檯梁結合。金柱係木圓柱，向上有收分，週長1.24米，下低有柱櫍，紅砂岩柱礎。明間前金柱間有格架枋，枋底刻「時康熙丁卯歲仲冬丙子吉□名山公房眾孫捐金鼎建」。次間前牆開門洞。花崗石臺基，前便有4級花崗石級。石屎鋪地。內山牆頂畫八字卷草。後牆頭畫博古圖案。

攷

• 陳建華 等編 (2008)。《《廣州市文物普查彙編·海珠區卷》》。廣州：廣州出版社。ISBN 978-7-80731-659-6。
• 〈明代古祠堂遭強拆村民自發守護(圖)〉。《大洋網-廣州日報》。新浪新聞中心。2009年4月22號。喺2018年1月16號搵到。