現金

現金（粵音：jin6 gam1；英文：cash），廣東話又叫現錢jin6 cin2，係指以實質方式存在嘅錢，包括銀紙同大餅等。相對於其他有價值嘅嘢，例如貴金屬、債券等等，現金算係比較方便流通嘅物品。

歐元嘅大餅同銀紙

銀仔

一柞銀仔

内文：銀仔

銀仔喺經濟學定義係細小、平、又偏圓形嘅一嚿金屬或者塑膠，用嚟做錢。初時嘅銀仔多數都係用金同銀等嘅貴金屬整嘅，目的在於令到用嚟做錢嘅貴金屬重量有個易數嘅單位。但到咗今日，世界各大經濟體都有用銅等非貴金屬整嘅銀仔，而各經濟體都會用各種方式（自己掘或者進口）取得金屬，並且用呢啲金屬整一啲重量一致嘅銀仔。銀仔可以偽造，但喺人類史初期幫手創造一個錢嘅單位，令價值量度做起上嚟更容易，間接令銀行成為可能。打後阿基米德原理嘅發現令測試銀仔嘅重量同金屬純度更加容易，又令整假銀仔更難，促進咗銀仔嘅使用。

喺會用銀仔嘅經濟體當中，個銀仔用乜金屬造往往同佢面額有關：金最值錢，所以有金嘅銀仔最大面額，其次係銀，再落係銅。金幣往往俾人用嚟做大面額嘅交易，例如係政府消費等等；銀幣通常俾人用嚟做中等大細嘅交易，會俾人用嚟數稅、合同、同債嘅價值；而銅幣就係俾人攞嚟做日常生活嘅交易。呢個系統喺遠古印度經已存在，而中世紀嘅歐洲一路都用，連現代嘅經濟體都會用呢套「用物料分銀仔價值」嘅系統。

銀紙

内文：銀紙

銀紙係由銀行發行、用紙整嘅錢。一張銀紙上面通常會有個數字（面額）表示張紙值幾多錢（易數），可以攞嚟俾錢。喺要提升貨幣供應嗰時，央行會用機械大規模噉印銀紙出嚟。同銀仔相比，銀紙有好有唔好，例如係：

• 因為造料嘅關係，銀紙比較易爛，但同時又比較輕便易攜。
• 銀紙本身毫無價值－而銀仔因為用有價值嘅金屬造，所以就算啲人對隻貨幣失去信心，手上有大柞銀仔嘅人都可以（例如）熔咗啲銀仔佢，再用所得嘅金屬得到經濟價值（銀仔一定程度上算商品貨幣）；發行貨幣嘅組織可以任意噉印銀紙，所以政府梗會鍾意儲住柞金銀，等自己「手上有幾多價值」有個保障。
• 銀紙本身冇價值，比較容易造成經濟泡沫（指一件物品嘅價錢遠超佢本身價值），而當人對銀紙失去信心，開始要求「硬」啲嘅錢（例如銀仔）嗰時，就可能會造成「硬錢」供不應求，可以搞冧個經濟；事實係，喺銀紙使用早期，歐洲同美國嘅經濟專家都係因為呢個原因而對銀紙抱懷疑態度。

嚟自世界各地嘅銀紙；幅相係 2014 年影嘅。

投資考量

睇埋：Market liquidity

現錢可以話係 liquidity 最高嘅嘢，一個人揸住啲現錢，只要佢夠錢，就基本上實可以攞啲錢嚟換任何貨同服務，同時佢換嘢嘅過程唔會搞到佢啲現錢嘅價值無端端變咗。