鬼佬
(由番鬼跳轉過嚟)
（番）鬼佬（粵拼：gwai2 lou2）一般指白種人，係廣東話嘅俗語，意思係外國人。按字面理解，即係（外族嘅）半人半鬼[1]，由於舊時廣東人觀念，認為白人大多數都係紅鬚綠眼，又或者源自19世紀因外國軍隊入侵中國，而產生「鬼佬」呢個詞[未記出處或冇根據]。連英文都有gweilo呢個詞。廣義啲嚟睇，各種非東亞人種都可以當係鬼佬，要準確區分時，會講白鬼。
如此類推，白種人當中，女人叫（番）鬼婆，細路仔叫（番）鬼仔，細路女叫（番）鬼妹……黑人叫黑鬼[2]。
有好多粵語人口喺公衆地方都一樣用「鬼佬」呢個詞，佢哋認為呢個稱呼冇貶義或者爭議[3]。「鬼佬」呢個稱呼有出現喺香港嘅兒歌[4]，當時都冇人覺得有問題。
有啲白種人覺得鬼佬呢個稱呼係對佢哋嘅侮辱。重有根據香港法例，喺一個工作地方、學校、公共機構等，任何人如基於另一人嘅種族……作出唔受歡迎嘅行為（可包括口頭或者書面陳述）……作出嗰個行為嘅人即屬對佢個人作出騷擾（原文：第602章 第7條 種族騷擾）。即係話如果對方唔歡迎或者唔鍾意呢個稱呼，叫佢「鬼佬」有可能會犯法。另一方面，而家有啲住喺香港嘅西方人有時會笑笑吓自稱「鬼佬」，呢點反映出居港西方人嘅思想開始變化，由之前當呢個詞係污蔑至到宜家嘅入鄉隨俗。
官話
編輯
官話中嘅鬼子同「鬼佬」同義，但係多數形容日本人，而且有唔友好嘅意思，如「日本鬼子」、「東洋鬼子」，電影《鬼子來了》即描寫抗日戰爭期間嘅事；而白種人就稱為「洋鬼子」。近年多咗用「老外」呢個比較友善嘅詞作為對白種人嘅稱呼，重有紅毛鬼子等等。