《痞子殿下》（英文：Your Highness）係香港無綫電視製作嘅古裝電視劇，喺2022年8月首播，由周嘉洛、陳瀅、朱敏瀚同王灝兒領銜主演，並由吳岱融、曹永廉、張頴康、麥美恩、韋家雄同陳嘉佳聯合演出，監製陳耀全。
劇名「痞子」係北方話用詞，意思大概係「流氓」、「無賴」噉解。而且，呢套劇嘅背景設定喺一個完全虛構嘅武俠世界，同時亦係祝文君嘅遺作之一（祝文君喺2022年2月尾與世長辭）。
