憤怒鳥
(由發嬲雀跳轉過嚟)
憤怒鳥（英文：Angry Birds，粵語意思「發嬲雀」）係由芬蘭Rovio Mobile開發嘅電子遊戲，2009年12月11號喺蘋果iOS首先推出，頭一年已經賣出過千萬。由於隻遊戲受歡迎，公司亦為第啲智能手機系統（包括Android）出發嬲雀遊戲。
憤怒鳥重有特別版，包括發嬲雀經典版、Angry Birds Rio、Angry Birds Space、發嬲雀之星球大戰同埋發嬲雀之星球大戰Ⅱ。
玩法
編輯玩家要控制唔同色水嘅雀，幫佢哋由邪惡嘅綠色豬手上搶番啲蛋。每關啲綠色豬會匿喺用木、冰、石頭等等起嘅建築，而遊戲目的係打低所有豬。玩家要用丫叉射啲雀出去打啲豬，又或者破壞啲建築去令啲豬磧死。有啲關亦會有岩石同埋收埋炸藥嘅木箱幫手打啲豬。
遊戲裏面嘅雀有唔同種類。初頭淨係得最基本嘅紅色雀可以用，之後會出現有特別技能嘅雀，好似藍色雀可以一隻分裂成三隻、黑色雀會爆炸、白色雀會生會爆炸嘅蛋、黃色雀會加速、大紅色雀攻擊力高、綠色雀就會回旋。而啲豬亦有唔同大細，大隻啲嘅會襟打啲；有啲豬會戴頭盔令自己襟打啲，戴王冠嘅就更加襟打。而每死一隻豬就加5000分。
每一關提供嘅雀都有特定種類、數量同埋次序，如果可以用呢啲雀打低晒啲豬就算過關，可以玩下一關。破壞建築物料、打低啲豬都有分，如果有雀係冇用到嘅重會有特別加分。