白飯魚 (鞋)
呢篇文講一種鞋。想搵種魚嘅話，請睇白飯魚。白飯魚係帆布鞋嘅一種，係香港對白布鞋嘅俗稱，佢形同色似白飯魚，所以有咁嘅名。白飯魚通常喺中國大陸出產，用帆布做鞋身，橡膠做鞋底，底部大部份都係綠色或者黑色。通常包裝上便都寫住網球鞋。因為夠平，唔怕整污糟，所以做三行都會着住來做嘢。另外喺中式喪禮，家屬要全身着白色，所以就會買一對平嘅白飯魚淨係喺喪禮嗰陣着，喪禮完咗之後揼亦都唔會太可惜。
白飯魚係運動鞋，但比其他運動鞋平，所以1970-1980年代唔少人着嚟做運動。由於穿着方便，1980至1990年代唔少香港嘅細路，都會着白飯魚唔着襪落街玩。
白飯魚曾經係唔少香港中小學體育堂指定嘅運動鞋，但係後嚟物理治療師發現白飯魚結構單薄，除咗唔能夠對腳部提供足夠嘅保護之外，重可能因此引致受傷，要求學校唔好強逼學生着白飯魚，之後大部份學校都改為全白運動鞋。