社會影響

社會影響 (英文：Social Influence) 係一種社會學嘅現象，講緊一個或者一班人會隨住個社會嘅變化而跟住去改佢哋嘅行為。社會影響發生嘅方法包括：埋堆、社會化、領導才能、同埋市場學等等。呢啲變化可以係嚟自某啲其他人嘅行為或者睇法，亦有可能係嚟自大家估其他人會有嘅行為或者睇法。

喺1958年，哈佛大學嘅心理學家 Herbert Kelman 提出將社會影響分做3種：

1. Compliance (聽話)：口講話同意其他人，不過心底裏其實唔認同，只係唔出聲
2. Identification (認同)：因為對於某啲高社會地位嘅人，例如KOL，有好大嘅尊重，所以開始跟佢哋嘅睇法
3. Internalisation (深入化)：無論口講定係真心，都係接受某一種信念或者行為

學家 Morton Deutsch 同埋 Harold Gerard 形容人有兩種需要，令到社會影響嘅出現。第一個係知識社會影響 (英文：Informational social influence)，即係人好想自己啱嘅需要；第二個就係名義社會影響 (英文：Normative social influence)，係人好想其他人鍾意自己嘅需要。第一個令本身已經唔係好肯定應該點揀嘅人，去跟大隊嚟諗，係對於心底嘅影響。第二個就係唔想喺社會畀其他人知道自己有一個比較騎呢嘅諗頭，想大家都鍾意自己，所以就跟大隊。但係，呢個就純粹係對於口講嘅影響，心底裏可能一樣照舊咁諗。