穿金寶扇 (1959年)

《穿金寶扇》（粵拼：cyun1 gam1 bou2 sin3）（英文：Gold-braided Fan）係1959年嘅一齣港產黑白粵語戲曲片，由蔣偉光編導，任劍輝、白雪仙主演。

情節

尚書呂剛個女昭華本來同郭炎章有御賜嘅穿金寶扇為媒訂咗親，炎章家道破落之後投靠呂剛，呂剛嫌炎章家道中落，想話悔婚。昭華表妹桂英想試探昭華對炎章嘅睇法，假扮炎章偷入昭華閨房迫昭華表白，俾呂剛睇到以為兩人越禮，將炎章逐出家門，炎章就以為昭華串同阿爸悔婚，對昭華誤會重重，一怒之下就上京赴考。

炎章臨走嘅時候，昭華曾經喺雪夜之下追蹤炎章想同佢解釋，點知追唔到之餘重被誤認係殺死自己表哥嘅兇手。原來，昭華表哥張耀泉暗戀昭華，偷走咗把穿金寶扇，點知俾歹徒殺死。昭華被誤當係兇手，判咗佢去塞外充軍。

原來炎章當時已經高中探花、做咗使節，派咗去同蠻夷修好。昭華同炎章喺軍營重遇，經過桂英嘅解釋，兩個終於冰釋前嫌，呂剛亦都查出真兇，幫昭華洗脫罪名。